2016年7月1日星期五

【親子沖繩體驗之旅】大鄉理出城記

24 JUNE 2016(FRI)

五歲仔先第一次搭飛機去旅行,其實小小豬又真係好似幾水皮,不過我就覺得依個年紀去旅行都幾好,起碼佢地可以自己親身經歷玩過咩...做過咩,有深刻啲印象唔係好啲~
 
其實原本我地都打算趁小小豬升小一前嘅暑假,同佢去一轉旅行,等佢可以見識一下之餘又可以玩下,輕輕鬆鬆咁玩完先過佢嘅小學生涯。

不過我地嘅計劃就提早左,因為我地三口子非常榮幸,可以得到美素佳兒邀請,參加四日三夜親子沖繩體驗團。

我都唔怕醜咁講,沖繩俾我嘅第一印象就會想起「戀戰沖繩」依套電影,記得係會有好多靚嘅風景同陽光海灘,所以對鐘意睇風景嘅我地嚟講都有點期待呀! 

機場我地之前都嚟過幾次,不過正正式式係嚟搭飛機都係小小豬嘅第一次,所以小小豬由check-in到入閘都係表現得既新奇又緊張,仲成日以笑蓋住佢嘅不安,其實小小豬一向都係安全感不足嘅小朋友,所以佢嘅表現我都好理解,話晒第一次出門,唯有俾多啲信心同安全感佢啦~
 
恨左好耐終於可以係依個位打卡~ 

我地上飛機啦~ 
 
第一次搭香港航空,感覺都唔錯,其實都只係差左一個豐富嘅飛機餐,全程都同其他航空公司分別不大呀~ 
 
係依兩個小時飛行過程,小小豬可以話係發達,因為平日唔可以玩嘅電玩,可以透過依兩小時慢慢玩。其實平日係唔可以呀....不過搭飛機咁興奮,就破例俾佢玩一陣電玩同睇一套卡通片啦~ 
 
一嚟到沖繩,日本領隊哥哥就為我地介紹沖繩有關嘅事跡,同埋講解我地依幾日嘅行程~ 
 
聽書依啲就留俾DADDY啦,小小豬話佢要好專心咁睇下街道,仲話沖繩啲風景好靚哦~
 
我地到沖繩都已經係四點幾,所以第一日行程就輕鬆啲,那霸市內最大嘅商場Naha Main Place~

我個人覺得就係安靜版SOGO,因為都係一般百貨公司,但就係非常靜(日本人真係好溫柔呀),相信最嘈都係小小豬啦! 

估唔到我地係沖繩第一個付款活動就係玩依個拍拍機,其實我地都唔知玩咩,只係見燈就指,兩父子傻拍一返咁啦~
 
之後小小豬就去扭彈彈波~
 
跟住就齊齊去玩具部睇玩具(冇錯..係睇ONLY冇買...哈哈),由於初時我地都唔知玩具部係邊,估唔到小小豬主動提意 問店員,仲用佢啲唔純正嘅日文加英文問,真係俾佢笑C(點解小小豬識日文....因為依其學校教緊不同國家語言,剛好出發時教緊日文嘅見面話,所以依隻豬 就以為自己好叻咁啦)~ 
 
有得去旅行心情都真係唔同啲,見到商場內嘅公仔,小小豬竟然主動叫我幫佢影合照,佢真係冇乜幾可呀~
 
行左一陣,見仲有少少時間,咁就去行下師奶仔勝地 - 超市,聽朋友講沖繩啲苦瓜係好出名,所以都曾經有心思思買幾個返香港,不過......我地仲有幾日行程,天氣又咁熱,怕未返到香港就已經熟到爛,所以都只係睇下就算(但...真係又平又靚,好吸引呀)~
 
今次行程小小豬都有帶佢嘅私家相機(其實係我之前買嘅防水攝影機),等佢可以拍低自己鐘意嘅嘢,其實佢真係邊行邊影,就連個公仔都唔放過,仲影左好耐....對住佢依個表現,真係唔知好嬲定好笑呀~
 
唔好話我祟日,沖繩地方真係就連街上面都乾淨啲,空氣都清新啲,就連馬路旁嘅草綠啲呀~ 
 
行完商場就去食我地第一晚嘅沖繩宴,係市內一所好有名嘅燒肉店 - 敘敘苑~ 
 
燒肉其實即係日本版韓燒,日本人對食物講究都知,就連前菜都可以咁擺得咁靚,而且仲幾好食添(尤其係個似粉絲嘅小碟,小小豬九秒九就食晒啦)~ 
 
我地三口子就食左兩客豬肉同一客牛肉,真係勁好食,尤其係個豬腩位,肥瘦均勻,入口超滑。老公都贊個牛好食,尤其係個牛舌,一啲都唔韌呀~ 
 
小小豬都食唔停口,食得仲多過我呀~ 
 
嘩...食完咁多肉,仲有一碗海鮮粥,真係超級豐富呀~ 
 
哈哈哈...小小豬就開心啦,因為小朋友仲有橙汁同雪糕食,真係非常HAPPY呀~
 
搭左一轉飛機又玩左成日,小小豬都已經冇晒電,係旅遊巴上已經瞓左啦~ 
 
坐左大約一小時車之後,我地就到達今次四日三夜所入住嘅酒店 - The Ritz-Carlton, Okinawa。
嘩....一踏入房間真係有啲不能相信,因為房間入面係勁大勁舒服,房間內加多一張小床都仲有好多空間,真係非一般渡假酒店呀~
 
而且佢嘅設施都好齊存,仲因為我地有小朋友,安排左好多小朋友用品添~ 
 
咖啡機都有一部俾我地使用~ 
 
仲有一部空氣清新機,我都係第一次見酒店有提供呀~
 
當然仲有啲自費小食提供啦~ 
 
玩左成日,唔止小小豬...就連我都真係攰都冇朋友,所以快快手就走去瞓,迎接第二日嘅精彩行程呀!


**我地的FACEBOOK PAGE,齊齊來交流親子。育兒。烹飪啦**
Picture

沒有留言:

發佈留言