【生日澳門之旅】玩都唔願走嘅天浪淘園

27 AUGUST 2016(SAT)

瞓咗一覺好嘅，當然又係要去玩既時候， 坦白講，今次嚟澳門入住Galaxy，我地最期待嘅就一定就係天浪淘園， 因為大家都好想去玩激流呀~

 

當然未去興奮放電之前，我地緊係要去醫肚，所以一行六人就嚟到FESTIRA食個豐富自助早餐先啦~ 
 
我食過幾次嘅自助早餐種類都唔會太多，不過今次依家又真係有啲驚喜， 估唔有咁多野食呀！

一般嘅麵包、粥品、點心同生果依啲大路嘢，當然冇走得啦~

 

最估唔到就係有好多熱葷，就連葡國菜式都有，唔講我都以為係食緊自助午餐...哈哈哈~ 

 

仲有廚師即叫即煎嘅PANCAKE~ 

 

乳酪都有六款任選呀~

 

早餐片都有四款，全場亮點係.....益力多呀，真係好少見有益力多任飲呀~ 

 

當然唔少得仲有唔同種類嘅果汁啦~ 

 

其實食物又真係唔止我影嘅咁少，因為我地爭取時間要去玩水嘛！雖然我地係急急口密密食，不過我地來來回回都食左好多轉，啲食物整體上都唔錯，所以大家都勁滿足呀~

 

終於嚟到我地今次澳門之旅嘅主菜，就係去天浪淘園玩水啦！坦白講我真係俾那全球最大規模嘅衝浪池及575米空中激流所吸引，但原來天浪淘園唔止一個激流，仲有好多嘢玩呀~ 

 

一行到入天浪淘園真係睇到我嘩...嘩....嘩，因為人工沙灘成個感覺就勁有渡假FEEL，靚到渡識形容呀~ 

 

坐係度休息一陣真係人都輕鬆啲呀~

 

兩位小朋友又點會甘於坐定定呢，佢地已經即刻走左去衝浪池玩浪啦~ 

 

其實啲浪都冇想像中般咁波濤洶湧，大部分時間都係輕輕湧埋嚟，而且衝浪池底部都舖左膠墊，同埋在場都有勁多救生員當值，可以話係零危險，所以絕對啱大小朋友嚟玩浪呀~

 

玩左大半個鐘，之後我地就行去空中激流~

 

係嘅路程中，仲有好多表演者同我地嚟互動，見到小朋友仲會停低玩一陣，好有氣氛呀~

 

其實我真係超級期待依個激流好耐，所以一落水就即刻抱住個大水泡去遊遊遊~ 

 

不過小小豬就好似唔太ENJOY，其實係因為個水泡太大，佢坐唔到係水泡上，明顯就係有啲驚(都係怪我又唔記得帶埋佢個私家水泡嚟澳門)。

雖然係有啲驚，但又要玩哦，所以最後DADDY就諗到俾佢騎膊馬咁漫遊激流啦~ 

 

其實前半部分嘅激流都係好歎，坐係大水泡隨水飄流~ 

 

不過去到後半部分就開始有水花、水柱、花灑、瀑布四面埋伏，都真係幾刺激呀~

 

玩左兩轉激流之後，DADDY都真係冇乜力，所以我地就轉戰去兒童玩樂區，等小小豬自由暢玩一番啦~ 

 

DADDY休息過後就去左玩那透明滑水天梯，原本小小豬都好想一齊"SIR"，不過要120CM先可以玩，咁我地唯有企定定等DADDY啦~

 

根據DADDY嘅探子回報，係有三個唔同程度嘅滑梯，不過實在太受歡迎，好多人排隊，所以都唔可以試晒三條，有點可惜呀~ 

 

係滑梯旁邊都有另一個人造沙灘，不過小小豬始終都係鐘意衝浪池多啲，所以冇入去玩呀~ 

 

最後我地就順返小小豬意，再去衝浪池作最後衝線，俾佢玩盡依個天浪淘園啦~ 

 
其實我又真係唔多想走，唔好話小小豬，就連我都未玩夠。但我地要趕住十二點鐘CHECK OUT，所以係十萬個唔捨得嘅情況下，都要忍痛離開了！ 

原來只要入住「澳門銀河渡假區」內6間(「銀河酒店」、「大倉酒店」、「悅榕莊」、「JW萬豪」、「Ritz Carlton 」及「百老匯酒店」酒店住客，就可以免費任玩天浪淘園，所以DADDY話下次可以留意依六間酒店邊間有優惠套票，就再帶我地嚟玩呀！ 

希望可以係十一月前再嚟多一轉，如果唔係就要等明年暑假先可以再嚟玩啦！

**我地的FACEBOOK PAGE，齊齊來交流親子。育兒。烹飪啦**