2016年9月19日星期一

【Halloween Is Coming】Disney Halloween Time 反轉迪士尼

19 SEPTEMBER 2016(MON)

作為一名迪士尼粉絲最開心就一定係可以第一時間就可以入園玩最新限定活動,仲唔係超級興奮之事。

萬聖節就嚟到,就緊係要去撞鬼,多謝迪士尼樂園邀請,今日有機會入園參加最新活動 - Disney Halloween Time 反轉迪士尼~
 
有得入嚟玩我就緊係開心,原本都好想帶埋小小豬一齊入嚟玩,不過佢又未放學,就算我等到放學先齊齊入園,加上第二朝又要返早學,所以今次又係天使勝出,我就自己入園玩返轉輕鬆一個下午先啦! 

睇廣告見今年迪士尼雖然好似少左啲同互動環節(我仲記得上年係迷離莊園同啲狼人捉左去跳舞,好好玩呀),其實都有丁點失望。不過原來依個只係我初步對迪士尼萬聖節認識,今日入嚟玩真係感受到一個好好氣氛嘅Halloween Party。 

往年迪士尼萬聖節活動就集中係星期五、六及日,作為我依啲銀卡人仕都真係要夾一夾時間先可以嚟玩。不過今年就由今日起至十月三十一日,全天候都係萬聖節,幾時入鬼屋撞鬼都得呀! 

入嚟迪士尼我就最鐘意睇巡遊Show,聽住歌又睇跳舞,真係連自己都會周身郁。為左今個萬聖節活動,有兩場巡遊Show。

先係一個「米奇Halloween大街騷」,米奇同埋佢嘅一班好朋友齊齊著上萬聖節打扮齊齊跳舞,好有氣氛呀~
 
一眾米奇朋友仔落力唔在講,原來仲有一班小朋友齊齊跳舞為我地表演,著晒Halloween衫真係好可愛,唔知下次小小豬入園有冇機會去表演呢(好明顯我係發夢中啦...哈哈哈)~ 
 
睇完一班迪士尼朋友仔表演,我嘅集郵心已經濃厚,所以就當然即刻要去搵佢地嚟集郵一番啦~ 
 
原來同佢地影完相,仲可以嚟個「Trick or Treat?」,Donald送左粒棉花糖俾我呀~ 
 
其實每次萬聖節都有好多南瓜佈置,難得今日我自己都扮得靚靚地,所以就唔知醜咁影多幾張相,等我嚟自戀一番啦(希望唔好趕客啦..哈哈)~ 
 
之後繼續去集郵,因為夢想花園已經變成「迪士尼惡人花園」,多位壞蛋朋友會分兩批,每半小時出場一次,同大家嚟個親密接觸呀~
 
因為時間關係,今次唔可以同晒咁多位朋友集郵,不過唔緊要可以同到大灰狼影都好滿足,你知啦....大灰狼同小豬係有好密切關係嘛,下次入園一定要帶小小豬嚟個世紀合照先....哈哈~ 
 
係「迪士尼惡人花園」都有兩個「Trick or Treat?」位置,姐姐仲會俾好多棉花糖,如果小小豬在場,一定開心C佢呀~
 
我地仲乜咁趕?咪就係因為要去入鬼屋。不過未入鬼屋就已經有驚喜,因為途中見到樹妖名同飛蛾怪,當然又係時候趕集郵啦~ 
 
其實上年迪士尼冇鬼屋,唔多唔少都有點失望,始終覺得有鬼屋先叫萬聖節。今年終於返嚟,以迪士尼電影形式嘅「詭夢實驗室」又真係幾吸引~  
以《公主與青蛙》嘅黑暗世界、《魔盜王-決戰鬼盜船》監獄、《反斗奇兵》阿薛玩具箱同埋《愛麗絲夢遊仙境》,真係覺得好吸引。係大霧及漆黑一片嘅密室內,其實我都真係幾驚,好在有大仁及其朋友一齊行,我自己一個一定唔敢入去。相信佢地都應該唔係俾場內環境嚇到,而係俾我尖叫聲嚇親。我唔劇透太大了,不過個監獄同埋愛麗絲迷宮我真係有啲驚,大家自己入去親身感受下啦!

離開「詭夢實驗室」仲有幾位靚鬼同大家集郵呢~
 
玩過鬼屋出嚟就已經天黑,入夜後嘅城堡又好似多左一份神秘呢~
 
由於今日係第一天正式舉行反轉迪士尼,所以就嚟一個簡單又隆重嘅掲幕儀式,有王宗堯同六大惡人: 大灰狼、101斑點狗女魔頭、Jack、Oogie Boogi 、小飛俠船長及紅心皇后齊齊與大家亮相~ 
 
嚟到反轉迪士尼嘅另一個高潮位置,就係由邪惡皇后同無惡不作嘅巫師賈方帶領紅心皇后、啤牌士兵、虎克船長、猙獰海盜以及JACK嘅「迪士尼惡人大出巡」,雖然整個表演時間都係好長,不過整體配合得好好,尤其將城堡配合投影效果及噴火,真係好精彩,絕對係我個人推介呀~
 
其實今年反轉迪士尼活動真心係覺得比往年萬勝節活動做得好,單看佢地以電影橋段設計鬼屋,都可以感受佢地那一份誠意,希望可以繼縯有依個誠意,嚟緊嘅限定節日活動可以更加精彩啦~
 

More Information :
Website:http://www.hongkongdisneyland.com/

Facebook:https://www.facebook.com/disneyland.hk



**我地的FACEBOOK PAGE,齊齊來交流親子。育兒。烹飪啦**
Picture

沒有留言:

發佈留言