2016年9月7日星期三

【生態保護 由我做起】生物資源 識取惜用 可持續使用資源

30 AUGUST 2016(TUE)

今日同小小豬嚟參加左一個好有意義嘅活動,就係應邀出席由環境局可持續發展委員會舉行嘅「生物資源 識取惜用」傳媒導賞團活動~
 
其實咩係可持續使用生物資源?初時都以為係同環保有關,咁我又覺得小小豬都有做開呀,因為其實我地都有同小小豬加入一啲環保意識,好似我地都會有廢物分類回收咁。但原來係比環保意識仲多一層次,應該係話更深層化啲,以可持續的方式使用生物資源,盡量減少對有關物種或環境嘅影響,咁對我們日後嘅後代對生物資源需求同時又可以得到滿足!

「行超市」又同可持續生物資源有什麼關係?原來只要我地購買日常用品時,改以選用可持續方式使用生物資源食材為首選因素,就名以簡單地為生態環境出一分力啦~
 
未開始時小小豬都對活動未太了解,所以就睇下個有關文件,自己乖乖地打個底先~ 
 
活動開始就係由香港大學嘉道理研究所代表帶我地「行超市」,集中四個種類同我地慢慢講解可以做到「生物資源 識取惜用」

第一站我地就嚟到海產部~  
 
由於過度捕度引致供不應求,好多魚類數目都已經大幅減少,就好似紅衫魚為例,過去十年間漁獲量已經下降了30%,所以我地都可以考慮改食其他海鮮/魚類,避免過量食用,咁就可以防止絕種。 有見及此,就設定了一些認可嘅標籤識別環保海鮮,既可以鼓勵食用其他類別,亦可以為生態作少少幫助~ 
 
MSC藍色標籤獲海洋管理委員會認證為管理良好及可持續利用的野外捕獲海鮮,海洋管理委員會是一個旨在保護海洋生態的國際性非牟利組織,是野生鹹淡水漁獲漁業標準和產銷監管鏈標準的發行人,這些標準的認證服務由MSC承認的第三方提供。

另一個asc綠色標籤則獲水產養殖管理委員會認證為負責任養殖水產,確保對環境及社區的負面影響減至最低~
 
除左急凍魚塊之外,一些罐頭魚都會有這些標籤呀~
 
就連一些雪藏魚都同樣可以搵到標籤呀~
 
第二站就嚟到紙品相關產品~ 
 
紙巾可以話係最快兼最大嘅消耗品,紙品嘅原材料就係樹木,全球每年有70,000平方公里嘅森林遭到砍伐,相等於每分鐘有20個足球場大小森林消失,大量林木消失會令空氣中二氧化碳濃度激增,加快溫室效應,同時亦破壞森林生態平衡。如果我地購買來自有規管可持續發展森林原材料嘅紙巾,咁咪可以為生態平衡出一份力啦~
  
依家我地係大多數見到嘅標籤都係FSC MIX,產品係來自FSC認證的木材和木質纖維,或可循環利用嘅材料,材料受到監管,都可以放心使用啦~  
依個攪笑小小豬就續一檢查,話日後只會買有此標籤嘅紙巾哦~
 
第三站就係清潔劑部~ 
 
小小豬一嚟到就不停搵標籤,不過佢一直都係搵唔到,因為依個棕櫚油有關嘅標籤佢就完全冇出現過~ 
 
係呀...真係冇,因為香港(或者係好多地區)都仍然普遍使用含有棕櫚油物質,棕櫚樹遍佈熱帶雨林,如用作種植棕櫚樹而遭到砍伐,會導致許多瀕危物種棲息地被破壞,所以真係好值得大家留意~
 
最後一站就嚟到茶葉及咖啡部~ 
 
綠色青蛙標籤就燧雨林聯盟認證,代表產品係生產過程既可以做到保護環境生態,同時對原產地資料都好大透明度添~
 
活動係未完嘅,之後我地就轉戰食左一個好豐富嘅「可持續發展」午餐~
 
由「有營廚神」徐欣榮先生向我地簡介街市選購可持續使用食材小貼士,同時亦都教我地如何用其他食材代替一些可能消失嘅海產師傅話平時去街市可以留意下食物的來源,例如海產食品可選購 Accredited Fish Farm Scheme優質養魚場計劃 (AFFS) 的魚類,香港都有唔少優質養魚場,最常見是烏頭魚,食得健康,亦減少對環境的影響~
 
最好就係即場教學,我自己都偷師唔少呀~ 
 
以紅鮋代替紅衫魚,煲豆腐魚頭白菜湯~  
 
用烏頭魚嚟做芒果沙律~ 
 
蕃茄亞麻籽焗紅鮋~ 
 
以豉椒炒青口代替炒蜆~ 
 
味道真係幾好食,最好就係一啲都唔難煮,有機會我都想試下。為下一代著想,平日買餸都可以嘗試以一些代替品,代替可能消失海產。

今日生活化地為小小豬上左一課保護環境生態課堂,其實對小小豬都有好大嘅得著,起碼佢知道買啲咩產品係對環境出一份力。雖然依啲標籤產品係會比同類嗁貴少少,不過為左我地下一代,付出多少少我都認為係值得的。

如果大家對是次公眾參與有任何意見,歡迎於2016年11月15日前把您的意見電郵至comments@susdev.org.hk。如欲了解更多有關公眾參與活動的資訊,歡迎登入 www.susdev.org.hk。 

「識取惜用」可持續使用生物資源公眾教育宣傳短片 https://hkstrategies.egnyte.com/dl/M11lUD8Hao/2016.08.15-ENB%20HQ%203.mov_


**我地的FACEBOOK PAGE,齊齊來交流親子。育兒。烹飪啦**
Picture

沒有留言:

發佈留言