2016年10月20日星期四

【健脾又護眼】紅蘿蔔無花果瘦肉湯

20 OCTOBER 2016(THU)

秋天一到,我地三口子都真係乾乾地(我指皮膚),所以依家一定要煲多啲滋潤及健脾養肺嘅湯水,咁可以幫助補充水份,同時又可以可滋潤肌膚。最重要係如果依家唔好好保持,如果唔係小小豬個濕疹又嚟就大件事。 

今次就煲左紅蘿蔔無花果瘦肉湯,既滋潤又健脾,同埋可以護眼添~
其實一向我地煲湯時加入紅蘿蔔,都係因為要佢嘅甜味,唔會成為主角。不過原來用紅蘿蔔嚟做主角,都一樣係好有益,因為紅蘿蔔含有豐富維他命A,可以入肺脾之經,能健脾化滯、潤燥明目,可以增強免疫力,亦有護眼功效。而且秋天仲要係當適季節,不時不食...緊係要煲多啲呀!

材料:紅蘿蔔2條、無花果6粒、蜜棗3粒、淮山10塊及豬肉眼約$40~
蘿蔔去皮以滾筒式切塊;瘦肉洗淨汆水;其他藥材用清水浸10分鐘~
煲內放約4L水,然後加入所有材料~
待滾起後,先用大火加蓋煲約30分鐘~ 
再轉慢火加蓋煲多1個半小時~
最後加少少鹽就飲得啦~
 
今次主要都係以紅蘿蔔為主,估唔到啖湯係咁甜,有好香嘅紅蘿蔔味,所以小小豬都飲咗好多碗,仲叫我下次再煲過添!
  

溫馨提示:
- 紅蘿蔔雖然好味又有益,但由於胡蘿蔔素會在身體積聚,有機會形成高胡蘿蔔素血症,令手掌泛紅,皮膚也會比較黃,所以都唔可以食用過多。

- 由於材料都涉及藥材成分,所以係好因應個人體質,大家記得煲之前了解下自己,或者問下相熟中醫/藥材店職員,呢個湯料啱唔啱自己呀!



**我地的FACEBOOK PAGE,齊齊來交流親子。育兒。烹飪啦**
Picture

沒有留言:

發佈留言