2016年10月26日星期三

【涼住冷氣學環保】國際環保展覽 2016

26 OCTOBER 2016(WED)

今日送左小小豬返學之後,我就嚟左個大長征,因為我貪得意跟左朋友入博覽館,去參觀今日開始嘅環保展。

雖然我家都唔可以話做到環保工,不過環保對社會生態都係好重要一環,所以嚟睇多啲「綠色家居科技」見識多啲,咁對日後教小小豬都有少少幫助呀~

今年國際環保展覽2016係機場博覽館 Hall 3&6舉行,今年博覽以「環保方案‧應對氣候變化」為主題,所以參展商大多以減少氣體排放為主,所推介嘅產品到希望可以減低碳強度五至六成。

一入到會場就一定會俾環境局攤位所吸引,因為整個展區以大嘥鬼為主題,遠望都已經覺得好可愛啦~
 
不過除左可愛之外,其實整個展區都會有好多唔同嘅動畫片段、3D攝影區、就連地上都有好多唔同嘅環保資訊,真係可以話玩住嚟學環保呀~ 
 
今日我仲好好彩見到大嘥鬼出現,不過因為佢有工作在身,所以我唔方便去集郵呀~ 

「綠色運輸體驗」都係今年其中一個重要主題,所以我地第一部分就係去睇下最新嘅電動車。就好似依個最新推出嘅吊式電動車智能充電器,可以安裝於係靠牆柱車位,咁就可以唔需要擔心冇地方擺放,簡單咁吊掛係各大停車場啦~
 
佢仲可以利用藍芽控制充電器上落,而個充電頭都係適合任何歐盟車輛,所以都好似好方便呢~
 
之後我地就去見識下啲電動巴士同埋七座位汽車我地可以隨便上去坐,座位又舒舒服服,所以行到攰去參觀都係一個唔錯選擇呀~
 
不過最吸引我都係依一個雙座位嘅細細私家車,佢係由理工大學協助研究,而佢嘅機件都係細細件,滴滴骰骰唔知喺街上行會係點嘅呢~ 
 
接住又係睇車,依部就係由IVE師生研發嘅太陽能車,唔好睇佢好似咁細部外表又怪怪咁,早前仲澳洲太陽能車比賽中可以行走3000km,所以真係唔好睇少呀~ 
 
睇咗幾部車,係時候睇番啲家居環保用具,先啱我依個師奶仔呀!

就好似呢一部無臭氧光解機,佢比現有嘅室內空氣清新機,殺菌程度 更加快。只需要幾秒鐘就消滅細菌同病毒, 感覺空氣都清新啲。負責人話出年年頭就會推出市面,到時都可以留意下先得~
 
接住就去睇下啲環保物料家具,就好似依個環保木傢具,以入榫方式唔會用上螺絲,而且仲可以因應需要,自行於檯腳唔同方向裝砌,而且裝砌都好簡單,真係小朋友都可以做得到,所以真係要俾個LIKE那位設計師呀~
 
另一個我覺得既環保又特別嘅,就係依一部玻璃瓶分色破碎機~
 
佢可以將回收及已分類嘅玻璃瓶壓碎,然後加工製成環保分色玻璃,之後就可以整成牆磚、地磚及室外建築物。我當然都係有即場試玩,將玻璃樽放入機口,幾秒就可以聽到"叮叮"嘅爆樽碎玻璃聲,聽落又真係幾刺激...哈哈哈~ 
 
睇見啲製成玻璃磚塊又幾靚喎,可以有好多唔同嘅花紋同顏色,所以我個人覺得依個玻璃磚真係可以大量引入,咁就可以用盡依啲難分解嘅玻璃樽類別啦~ 
 
場內又點止我今次提及幾個展位,由於我要預時間接小小豬放學,所以行左大約個半鐘我就要走,都未算行晒整個展覽。

不過嚟緊係29日(星期六)會免費開放予公眾人士入場。參觀人士除左可以行展位之外,仲可以參加環保工作坊,即席製作環保酵素和盆栽。而且仲有「綠色市集」則售賣創新綠色產品和保健品。所以如果大家有時間,都可以考慮帶埋小朋友齊齊去行一轉,齊齊邊玩邊學環保。有時間仲可以行返去機場,去睇下飛機升降,或者去T2 SHOPPING,開開心心又係一個親子日呀!

(題外話...係銅鑼灣/金鐘/紅磡 /尖沙咀/東涌都會有免費穿梭巴士提供,有關班次可以參閱以下網頁 *請按* )


More Information :
Website:http://www.hktdc.com/fair/ecoexpoasia-tc/%E5%9C%8B%E9%9A%9B%E7%92%B0%E4%BF%9D%E5%8D%9A%E8%A6%BD.html




**我地的FACEBOOK PAGE,齊齊來交流親子。育兒。烹飪啦**
Picture

沒有留言:

發佈留言