多謝 MOKO 新世紀廣場邀請,今日同小小豬去左超級無敵勁正VIEW嘅The Ritz-Carlton參加《哈囉‧小廚神》學做哈囉Cupcake~
MOKO《哈囉‧小廚神》Cupcake製作班就係嚟到位於The Ritz Carlton 118樓層嘅OZONE進行,一嚟到小小豬就急不及待要換上一身廚師LOOK,完全係一個作戰狀態準備好去跟甜品大師學整Cupcake啦~
由於係一個親子活動,酒店都好細心,枱嘅高度都會以小朋友高度為考慮點,咁就可以令小朋友整Cupcake時更加方便又安全啦~
細心唔止依樣,佢地仲為小朋友們準備啱SIZE嘅手套,我都係第一次參加親子活動係有小朋友SIZE,次次都係用大人SIZE,小朋友們都真係整得唔順手。其實我自己都想買好耐,不過一直都搵唔到,原來酒店係專登訂造一批俾小朋友用,佢地依個做法又點可以唔俾個LIKE佢呢(題外話:如果大家見到有小朋友SIZE嘅手套仔,請你地話我知,等我買俾小小豬用呀)~
依個小小豬一見到啲用具就扮聰明咁話開始整~
雖然我地平日都有間中齊齊整嘢食,不過嚟學做小廚神,緊係要聽左廚師哥哥示範先啦~
學識左個程序,就到小小豬開工,佢仲話自己識唔洗我幫手添~
初頭都叫做整得唔錯,不過最後咪又要廚師叔叔出手幫佢攪個粉漿~
專心咁吱個粉漿落杯仔,就可以請廚師叔叔幫忙拎去焗啦~
第一部分完成就可以休息一陣,先去個洗手間先。一入到去真係好大鄉理咁嘩左一聲(好在當時冇人,如果唔係真係失禮晒),因為望出去個VIEW真係好正呀~
之後我地就去享用大會為小朋友準備嘅小食啦~
見到咁多好味小食,依個為食小小豬又點會放過呢,佢仲拎左好多糖糖食,真係放肆了~
拎左小食就去坐定定,又嚟要嘩嘩聲,個VIEW真係超級無際勁正,邊食邊望住個靚環境,真係人都舒服啲呀~
係咁靚環境下,真係忍唔住要影返張相呀~
真係唔係講笑,大家睇下片段就知有幾正呀~
休息過後我地又準備開始整下一步,就係搓糖霜佈置Halloween Cupcake。其實依一個步驟對我同小小豬嚟講又真係難左少少,因為我地真係好少搓糖霜(或者係我地兩個嘅勞作都係麻麻啦),所以我地都要好留心睇廚師哥哥示範~

廚師哥哥三兩下手腳就整好左,真係好靚呀~
唔知我同小小豬可唔可以整到咁靚,哈哈哈...唔理咁多,整左先算啦~
好在有廚師哥哥幫手,小小豬都叫做可以捉到個技巧,之後慢慢整都叫做跟到啦~
廚師哥哥走左先識得搵我齊齊整,不過齊齊玩又真係幾開心呀~
登...登....登.....登......我同小小豬嘅大作完成,當然靚嗰啲就係有幫手~
小小豬全程落手落腳步去做,所以見到製成品嗰一刻都幾有滿足感呀(雖然出自佢手筆嗰啲又真係,不過都係佢努力嘅表現,所以...........唔好笑佢呀)~
最後小小豬仲得到大廚送俾佢嘅證書,學滿師可以下山啦(係118層離開,感覺仲唔係落山....哈哈哈)~

其實今日我都真係幾忙,先同小小豬返學,之後我就去睇醫生,跟住又趕過嚟學整Cupcake,唔多唔少都有少少攰。不過今日依個Cupcake製作班真係好好玩,好鐘意一手一腳由零開始去做靚靚Cupcake感覺,一個好好嘅體驗,滿足感真係100分。再加上係一個咁靚環境,廚師們又非常用心咁教一眾小朋友,所以都係值得呀!
如果想好似小小豬一樣化身星級小廚神,除左做Cupcake,仲可以試下整好可愛嘅便當。只要於MOKO新世紀廣場內以電子貨幣消費滿HK$3,000或憑MOKO VIP3,000積分,就係可以係10月16日 (星期日) 喺MOKO新世紀廣場嘅目利きの銀次餐廳,跟便當達人Candace Ku學整萬聖節造型便當,相信小朋友見到咁可愛嘅便當,都係一樣好開心㗎!
More Information :
Website:http://www.moko.com.hk/
Facebook:https://www.facebook.com/MOKOHONGKONG
沒有留言:
發佈留言