2016年12月14日星期三

【Iron Man保衛香港】鐵甲奇俠飛行之旅@香港迪士尼樂園

14 DECEMBER 2016(WED)

作為一名迪士尼粉絲,當知道樂園有新設施開時,內心都真係帶點點期待。終於Iron Man嚟到香港啦,我地仲好榮幸可以優先入嚟體驗「鐵甲奇俠飛行之旅」,真係十分興奮呀~

非常感謝香港迪士尼樂園嘅邀請,而且試一玩日子又剛剛好,因為今日剛好係小小豬假期,所以我就可以帶埋佢一齊入園同Iron Man見面呀!

當然我地一入園就即刻向明日世界出發,因為要去體驗「鐵甲奇俠飛行之旅」~
 
係未開始行入展區時,小小豬不停好緊張問....個遊戲會唔會好高?會唔會好震?好緊張呀!其實依排隻豬仔個膽仔好似細左好多,咩都驚一餐,唔知依啲係咪就係人地話嘅,越大個就越怕事,因為佢地開始識驚呢? 

好在....入場時那位工作人員姐姐好細心咁慢慢解釋俾小小豬聽,依個問題豬仔解除晒疑問之後,就可以安心入去啦! 

係未坐上飛行車進行「鐵甲奇俠飛行之旅」之前,我們會先經過「史達科技展」、「歷程展廳」、「防禦展廳」及「能源展廳」,以展出Iron Man唔同時期嘅進化過程~

Iron Man又真係好有型呀~ 

之後就去到「動能展廳」,可以睇到5部唔同型號「鐵甲號」~
 
到我地準備進行「鐵甲奇俠飛行之旅」之前,就先拎一幅3D眼鏡~ 
 
由於身高102CM以下係不宜參與飛行之旅,所以細細粒嘅小小豬又俾哥哥安排去度高(當然我事前係知小小豬一定夠高,不過.....唉....真係水皮,幾時先可以大個仔呀)~ 
 
一切準備好,就可以等待入去「鐵甲號」啦~ 
坐定定扣好安全帶就可以出發啦~ 
 
IronMan會帶我地由樂園出發,之後飛過九龍、維港至西九龍,全程畫面都可以見到香港街道景,好在親切感呢!整個劇場就好似4D影院,「鐵甲號」會隨劇情嘅爆炸、墜機及獲救,而不停搖晃,再加埋3D眼鏡,成件事就好有立體感,好真實呀~ 
 
完場時小小豬話IronMan好利害,救左我地全部人,如果唔係就全部人跌晒落水啦(小朋友世界就咁簡單,只係睇短片就當真....哈哈哈)~ 
 
之後我地就去「鐵甲奇俠裝備展」,因為要去親親IronMan呀~ 

與一般Meet & Greet有啲唔同,因為先由一位科學家為我地介紹IronMan裝備先~ 
 
但係幾秒鐘之後,IronMan就會行出嚟,佢真係好有型呀~ 
 
當然唔少得集郵啦~ 
 
不過,小小豬見到IronMan真身之後,佢就好似有點不自在,原來佢都係鐘意有毛毛嘅朋友多啲。所以最後都唔太願意單獨影,依個任務就交俾我啦,IronMan咁型我當然唔介意啦~ 

玩左咁耐都係時候要醫肚,小小豬話要食IronMan落肚呀....哈哈哈~
 
「鐵甲奇俠飛行之旅」將於明年1月11日開幕,各位粉絲興趣的話,記得要早啲入園親身感受與Iron Man一齊保衛香港呀!


More Information :
Website:http://www.hongkongdisneyland.com/

Facebook:https://www.facebook.com/disneyland.hk


**我地的FACEBOOK PAGE,齊齊來交流親子。育兒。烹飪啦**
Picture

沒有留言:

發佈留言