2017年12月28日星期四

【滋潤解燥】合掌瓜無花果百合湯

28 December 2017(THU)

小小豬病左成個星期,就冇乜點食成個星期,人仔都縮左成個碼,真係睇見我都超肉赤。

難得開始有返少少胃口,就當然即刻煲返啖湯佢飲,剛剛病好就不宜太進取(即係唔可以太補身),所以就清清地煲返個合掌瓜無花果百合湯,簡簡單單咁同小小豬調理一下啦~ 

2017年12月27日星期三

【玩滑草及水上單車】快閃綠田園

27 December 2017(WED)

之前係澳門玩過滑草同水上單車,小小豬都好鐘意玩,但...始終都唔係成日去澳門玩嘛。不過原來係香港都有一個地方可以一次過玩晒兩樣活動,所以就同小小豬嚟玩一轉!

其實原來我打算係聖誕前嚟,因為佢地推出任玩套票,可以玩盡場內所有遊戲(師奶仔就當然係想玩盡啦)。但因為小小豬病左,真係邊度都去唔到,足足病左一個星期嘅小小豬,終於叫做穩定返少少,冇再發燒發冷,又有返啲精神。困左成個星期係屋企冇得去玩,所以就去戶外玩一陣,放少少電啦~ 



2017年12月25日星期一

【玩VR迎聖誕】聖誕全城HOHOHO

25 December 2017(MON)

聖誕節就當然要去玩,一早約好左幾位好友,打算三個小朋友齊齊入去過開心聖誕。不過因為小小豬病左好幾日,為免佢抵抗力差去人多地方,咁就當然唔可以去玩,但又約好晒朋友,所以就我同兩個妹同好友齊齊玩返一個下午啦(辛苦老公幫忙照顧了,俾我放假一下)~

不過....阿Q啲諗,其實小小豬入唔到嚟玩都唔算好大損失(當然佢係勁想去兒童天地玩),因為今年海洋公園聖誕全城HOHOHO係以VR做主題,將有全港首個VR過山車,仲有兩大VR遊戲,年齡限制都要七歲以上兼有130CM,小小豬都未有咁高,所以佢入嚟都係陪我玩呀!  

2017年12月22日星期五

【祛頭風治頭痛】天麻川芎白芷燉魚頭

22 December 2017(FRI)

成日都聽啲朋友仔講話飲天麻燉魚頭湯可以祛頭風兼治頭痛,我當然係好想試下啦,因為我都真係成日都頭痛,有時連食止痛藥都冇效,所以頭痛絕對係我C穴。

想就想左好耐,不過一諗起啲藥材同埋個大魚頭,就怕係好難整,所以一直都未有去行動。早前去小店入貨時,見佢有一包包嘅湯包,同老板娘吹吹水之後,原來都好似唔係好難,所以我就買左一包湯包,之後去街市買個魚頭,試下燉嚟錫下自己啦~

2017年12月21日星期四

【機動遊戲又玩攤位】AIA友邦歐陸嘉年華2017

21 December 2017(THU)

一年一度嘅AIA友邦歐陸嘉年華又嚟啦! 

今日小小豬有個小任務,所以就可以係開幕日先玩一轉啦~

還記得小小豬第前年都有嚟過AIA玩過一次,嗰時都應該係五歲多,加上又細細粒,所以可以玩嘅嘢又唔算多。雖然今年佢都仍然係細細粒,不過好多遊戲都可以玩(尤其係可以自己玩攤位嬴禮物呀! 


2017年12月18日星期一

【益脾胃潤肺】猴頭菇蟲草花素湯

18 December 2017(MON)

又到左星期一,又係GREEN MONDAY時間,唔知係咪學校有教,所以逢星期一小小豬都話要食素,不過間唔中清淡一下都係好事,所以就煲返個益脾胃潤肺嘅猴頭菇蟲草花素湯啦~  

猴頭菇具有提高肌體免疫力功能,而且最重要係猴頭菇是一種高蛋白、低脂肪、富含礦物質和維生素,係一種優良食品嚟呀;蟲草花就有滋肺補腎護肝、抗氧化、防衰老、抗菌抗炎、鎮靜、降血壓、提高機體免疫能力等作用。而且蟲草花不寒不燥,具有補肺、補腎和護肝養肝的功效。(網上資料)  



2017年12月13日星期三

【預防傷風感冒】香茅南姜茶

13 December 2017(WED)

天氣突然又轉冷,我都好怕會冷親(你知啦...一腳踢嘅全職傻媽如果病左真係好慘,病住都要去照顧隻豬仔都幾辛苦呀),就係依個時候見有朋友仔分享依個預防傷風感冒嘅茶,咁簡單就當然即刻試下,為自己打好個底呀~

2017年12月12日星期二

【滋陰清熱】花旗參麥冬茶

12 December 2017(TUE)

依排少左煲涼茶,並唔係因為我懶左,只係多左焗茶嚟飲,簡單得嚟又可以密密飲暖暖地嘅茶,啱晒依家凍凍地嘅天氣。

睇報紙見到個滋陰清熱生津又可以滋潤嘴仔嘅焗茶,又似幾啱嘴唇成日乾裂嘅我同小小豬,所以趁屋企有齊材料,就試下焗依個花旗參麥冬茶啦~

2017年12月10日星期日

【教育導賞團】參觀立法會大樓

10 December 2017(SUN)

係電視就成日睇到議員係立法會開會情況,終於有機會可以嚟睇下啦!

其實係因為DADDY之前係網上見到有議員舉行教育導賞團,我地都成日好想嚟八卦下鏡頭以外嘅立法會係點,所以就即刻報名參加,好好彩我地又抽中(最好仲係免費...哈哈哈),所以就嚟參觀啦~

2017年12月9日星期六

【人燉我又燉】潤肺止咳 - 陳皮冰糖燉檸檬

9 December 2017(SAT)

成日睇介紹話陳皮冰糖燉檸檬好有效,所以攪到我都心思思想試下,不過一聽見話要燉15小時,所以都唔敢動手。不過....其實我內心深處都係有啲癮好想試下,加上又俾好友講一講,所以就的起心肝買齊材料去開工啦~

2017年12月8日星期五

【產品試用】Whirlpool惠而浦滾筒洗衣機FSCR80420

8 December 2017(FRI)

洗衣機可以話係每個屋企都一定會有兼用得好密嘅家庭電器,我屋企用緊那部嘅年紀都比小小豬大,亦都因為用左咁耐,而且亦都用得好頻密(我都唔明點解三口子嘅家庭我可以隔日洗一機衫),所以係時候要準留意下要有咩新款更換了。

就係依個時候收到惠而浦邀請,試用佢地新推出嘅滾筒洗衣機。老實講....開心還開心,不過家電嘅嘢一向都係由老公負責,所以我收到邀請我都有叫老公睇下啲資料,睇完啲坊間介紹老公都話唔錯,所以就有新洗衣機用啦~

2017年12月5日星期二

【自製慈善音樂盒】Shiny Golden Christmas@MOKO

5 December 2017(TUE)

我真係好鐘意聽音樂嘅聲音,中學時代仲曾經買過音樂盒CD晚晚播住瞓覺聽。今次有得自己製作音樂盒我就當然係勁有興趣,所以約埋朋友仔一齊嚟整啦~

2017年12月1日星期五

【超滋潤兼潤肺】鮮雪耳粟米紅蘿蔔湯

1 December 2017(FRI)

前幾日去九龍城買煲湯料時,見到店主剛剛返左好多大大粒又白雪雪嘅新鮮雪耳,當然即刻又買返一朵潤一潤。


原來我係打算用嚟煲木瓜湯水,點知兩位老細異口同聲話唔鐘意,最後....都係決定緊係用返嚟煲湯,買埋粟米紅蘿蔔,嚟一個超滋潤兼潤肺嘅鮮雪耳粟米紅蘿蔔湯啦~ 


2017年11月30日星期四

【產品試用】BOTANIST清爽順滑套裝

30 Novmber 2017(THU)

其實我個頭髮都真係幾難攪,厚得嚟啲髮質又粗,所以打理少一陣就會變得非常蓬鬆。除左可以用負離子整一整直佢之外,其實搵啱一款洗護用品都好重要。

今次得到來自日本嘅BOTANIST品牌邀請有機會試一試佢地嘅兩大皇牌產品,唔知同我個髮質夾唔夾呢~
 
日本大熱天然品牌植物學家BOTANIST嘅產品成分90%以上來自天然植物,不會過分沖走頭皮油分,而且係融合左植物和科學嘅護髮品牌追求「心靈上的滋潤」,令用家髮絲更健康和更美麗。

2017年11月29日星期三

【秋燥潤肺】無花果雪耳海椰湯

29 November 2017(WED)

踏入秋天,天氣都真係乾都冇朋友,所以就緊係滋潤湯水要密密煲。坦白講....秋天當然係煲無花果、雪耳、海底椰依啲食材,咁依幾樣加埋就可以潤腸、潤肺、潤心,總之就超級滋潤,絕對係秋燥必飲靚湯呀~

2017年11月28日星期二

【小小科學家與你Merry Kidsmas】動感科學園地 聖誕玩不停

26 November 2017(SUN)

我地嚟科學園都真係唔知有好幾十次,可能有朋友仔會問...嚟咁多次唔會好悶?

其實我地都真係唔會悶,因為每次嚟玩工作坊,佢嘅活動都係有唔同,而且隨著小小豬越嚟越大個,佢對STEM嘅認識又多啲,聽導師講解科學原理又好似明多啲,自己落手落腳做又多啲,投入感又多啲,所以小小豬玩得好享受呀!

2017年11月26日星期日

【嘉湖海逸酒店之旅】體驗聖誕溫馨家庭樂

25-26 November 2017(SAT-SUN)

暑假我地都已經去左北海道暢玩,所以嚟緊聖誕都應該留港了,其實香港都有好多好玩嘅地方,所以依家就努力搵下有咩好玩地方,等小小豬一放聖誕假期就去玩(其實....我地兩母子都係好貪玩呀)! 

雖然我地嘅聖誕節目仍然係計劃中,不過今日就先嚟一個兩日一夜嘅小渡假,因為我地三口子應邀嚟體驗嘉湖海逸酒店嘅「聖誕溫馨家庭樂住宿計劃」,開開心心享受一個週末啦~
 

2017年11月23日星期四

【滋潤健脾】紅蘿蔔紫無花果茶

23 November 2017(THU)

依排天氣都真係勁乾燥,當然要密密煲涼茶打好底先得。秋天就一定係煲多啲無花果茶飲,平日就多用雪梨煲,不過今次攪攪新意思,用紫無花果加配紅蘿蔔嚟煲,咁就可以滋潤健脾,啱晒小小豬飲啦~

2017年11月20日星期一

【LINE你上太空過聖誕】朗豪坊LINE FRIENDS CHRISTMAS PLANET

20 November 2017(MON)

一向我都係集郵怪,有得集郵兼影靚相我就當然非常樂意去玩,所以一個貪玩媽又趁小小豬返左學之後就蛇去同一班LINE FRIENDS去玩啦~

2017年11月19日星期日

【產品試用】Atorrege AD+舒敏補濕孖寶

19 November 2017(SUN)

作為一個平日唔多勤力(其實係冇乜時間)護膚嘅傻媽,真係好需要超強嘅補濕系列產品,可以簡簡單單令到皮膚靚靚,唔洗塊面乾爭爭咁啦! 

早前好朋友就向我推介來自日本樂敦家族醫學護膚品牌Atorrege AD+,而且仲安排我試用Atorrege AD+嘅舒敏補濕孖寶添~
 
坦白講,一聽到日本樂敦家族就令我諗起眼藥水,不過原來佢地仲有一個研發「醫學護膚品」的醫學品牌 - Atorrege AD+。佢地嘅產品係冇加入人造色素或人造香料,而且完成後都一定要通過「人體細胞安全測試」先推出,咁就可以確保產品絕無毒性及安全,所以產品就連孕婦及嬰兒都可以用呀! 

2017年11月16日星期四

【LEGO & Star Wars陪你過聖誕】《星球大戰:最後絕地武士》聖誕展覽

16 November 2017(THU)

自從小小豬係迪士尼扮過小武士之後,佢就開始對Star Wars認識,唔可以話勁鐘意,但見到啲Star Wars產品都會停一停...睇一睇(雖然都只係停留係黑武士、白兵、BB-8依啲係迪士尼出現嘅角式)。

原來嚟緊聖誕又會推出最新電影《星球大戰:最後絕地武士》,所以APM同LEGO就係聖誕來一個聖誕展覽。今日小小豬得到LEGO邀請,可以優先嚟睇LEGO同見下電影新角色呀~

2017年11月15日星期三

【補肺養脾】合掌瓜紅蘿蔔猴頭菇素湯

15 NOVEMBER 2017(WED)

秋天就當然要飲多啲改善秋冬乾燥嘅湯水,係網上見有朋友介紹依個素湯,簡單幾材料就可以煲到益氣又養好脾胃嘅靚湯水就當然要買材料試下煲啦~

2017年11月14日星期二

【好姊妹聚會】 宮崎日式燒肉店

14 November 2017(TUE)

突然抽到個引好想食放題,所以就相約好姊妹行一轉旺角,嚟宮崎日式燒肉店輕輕鬆鬆享受一個LADY NIGHT啦~

其實我地都係第一次嚟,不過係網上就見到好多朋友仔介紹,所以就跟風試一試啦


2017年11月10日星期五

【產品試用】BONDI WASH天然家居抗菌護理系列

10 November 2017(FRI)

天然家居抗菌護理用品我想每一個家庭都一定有需要,所以當收到公關姐姐試用邀請時,我都唔客氣了,因為坊間都有各式各樣嘅同樣產品,我自己都唔識揀,所以就可以趁今次試下BONDI WASH天然家居抗菌護理系列啦~ 

來自澳洲嘅BONDI WASH產品,都係用高級嘅植物天然成份,無毒性及可生物分解,而佢嘅香氣100%來自純精油,所以對人身體及環境都非常安全。此外,所有產品都含有澳洲原生植物精油,實驗室證明其強大抗菌功效,可消除99.99%嘅細菌(經獨立實驗室測試,通過要符合此標準必須能將大腸桿菌和金黃色葡萄球菌的數量降至原有的千分之一以下。)  

2017年11月8日星期三

【清喉潤肺】蘋果無花果蓮子素湯

8 November 2017(WED)

秋天一到個喉嚨就好容易乾,同時亦都好易有幾聲乾咳,之前都曾經問過中醫師,佢話係秋燥嘅症狀之一,唔需要太擔心,只要多啲飲用滋潤湯水就可以。就係咁....我今日就煲左一個清喉潤肺嘅蘋果無花果蓮子素湯,等我地三口子齊齊滋潤下啦~
 

2017年11月5日星期日

【健脾理氣】太子蔘淮山瘦肉湯

5 November 2017(SUN)

想飲湯但又唔知煲咩好,最好不過就係去相熟藥材店偷師,今次店主就介紹左依個太子蔘淮山瘦肉湯俾我,佢話可以健脾開胃、潤肺理氣、生津止渴,好啱依家天氣飲。咁當然我都好乖乖咁買一份材料,就煲俾兩位老細飲啦~

2017年11月4日星期六

【超邪惡小食】黃金脆魚皮

 3 November 2017(FRI)

上幾個月見到好姊妹整左依個邪惡小食,初時都唔知有咩咁特別之處(師奶仔見識少),直到前幾日聽一位剛外遊新加坡朋友講,佢晨咁早去店鋪想買特產咸蛋魚皮都買唔到,所以就令我"的"起條根,好想研究一下兩位好友口中超邪惡但又好好食嘅黃金脆魚皮係乜東東,所以就買齊材料自己試下整啦~

2017年11月3日星期五

【蟹粉嚟啦】上海姥姥限定蟹粉宴

2 November 2017(THU)

話說好姊妹係蟹粉愛好者,佢見到上海姥姥推出左限定蟹粉菜式就約我齊齊嚟食返餐。咁...我都好耐冇去街街,就趁依個機會蛇去同好姊妹相聚,食個開心晚餐兼叉叉電啦~
 

2017年11月2日星期四

【快閃集郵】與輕鬆小熊的約會

2 November 2017(THU)

今日趁小小豬放學前,我就快閃去左一轉尖沙咀,目的就當然係去同輕鬆小熊集郵啦~

其實依個快閃活動係為嚟聖誕鬆弛熊嘅活動預告,因為鬆弛熊同埋佢一班朋友仔會係聖誕節期間齊齊現身The ONE同埋皇室堡呀!

2017年10月30日星期一

【滋潤乾燥必飲】雪梨無花果水

30 October 2017(MON)

我成日都話小小豬係一個容易乾燥的男仔係依日早晚開始有啲秋風,就係咁佢個爆擦咀又嚟(慶幸身體上都未見濕疹壞朋友嚟探佢)。一見到佢咀仔又乾又甩皮,所以就快快手煲個滋潤乾燥必飲嘅無花果雪梨水,等佢可以快快手滋潤返先得~

2017年10月29日星期日

【野外定向比賽】生態捍衛戰2017

29 October 2017(SUN)

由我地正式報名開始,小小豬非常期待今日嘅來臨,因為可以正式參加生態捍衛戰2017野外定向比賽,今次佢仲負責教DADDY去玩,所以佢又點會唔興奮呢~

2017年10月28日星期六

【親子訪問】我係一名小BLOGGER

28 October 2017(SAT)

自問我只係一個年資可能比較耐嘅普通師奶仔blogger,當收到BabyKingdom邀請做訪問時,都真係有啲驚同緊張。一嚟我又真係好似冇乜talking point,另一原因就係我係一個不善表達,成日講完嘢得罪人都唔知~

2017年10月27日星期五

【免費體驗Light Painting】印象∞香港 光影樂遊

27 October 2017(FRI)

中環大會堂嘅展城館我都唔知去過十次有多,每一次我地去開中環附近一帶,小小豬都一定要我帶佢嚟行一轉,真係唔明點解佢可以咁鐘意去,睇咁多次都仍然係咁有興趣。

我地次次都係中午嚟,不過今日就轉一轉改為夜晚,因為我地參加左印象∞香港光影樂遊活動,學玩Light Painting呀~
 

2017年10月26日星期四

【產品試用】VIVLAS 茶秘奢華煥顏面膜

26 October 2017(THU)

轉天氣皮膚都易差啲,依排皮膚真係乾到冇朋友,都真係唔懶得要勤考力啲敷返面膜先得。就係依個時候收到公關姐姐送嚟嘅VIVLAS茶秘奢華煥顏面膜,當然就即刻試下好唔好用啦~ 

VIVLAS係韓國專利科技紅茶護膚品牌,取得GMP認證,一系列產品都係採用高品質嘅紅茶葉,再配合獨家專利成份以及高濃縮紅茶酵素精華液,將發酵出的酵素效果三重提升。


2017年10月25日星期三

【酸酸甜甜】檸檬冰糖雞翼

25 October 2017(WED)

早排係FACEBOOK見好多朋友仔都整左依個檸檬冰糖雞翼,個個都大讚簡單又好味。簡單餸就啱晒我,尤其係當你行左幾轉街市都諗唔到煮咩時,所以就買少少材料,跟住大家試整依個檸檬冰糖雞翼啦~


2017年10月24日星期二

【熱辣辣夠滋味】漁牧燒魚新食法

24 October 2017(TUE)

好姊妹話好想去試下燒魚,但又冇人陪,想約埋我一齊去食晚飯聯誼下。咁可以有得邊傾心事邊食好嘢我就當然唔介意,所以今日就拋夫棄子一晚咁多,同好姊妹去漁牧食晚飯啦~
 

2017年10月18日星期三

【養胃健脾】合掌瓜栗子粟米瘦肉湯

18 October 2017(WED)

秋天一到,街市就開始有好多又大又靚嘅栗子,我同小小豬都係愛栗子之人,所以就買番兩磅,一啲就用嚟炆雞翼,另一啲就買齊材料煲啖合掌瓜栗子粟米瘦肉湯飲下啦~ 

2017年10月17日星期二

【手機開箱分享】ASUS ZenFone 4 Selfie

16 October 2017(MON)

我一向都好少俾小小豬玩手機,尤其係手機下載嗰啲遊戲我都真係冇乜俾佢玩(只係有時儲夠印仔先可以玩一次TSUMTSUM),所以手機對於佢嚟講都只係用作影相或者開LIVE之用

感謝ASUS邀請試用佢地最新出主打自拍及直播嘅手機ZenFone 4 Selfie,對於鐘意影相拍片嘅我地真係啱晒。有新相機就可以同小小豬影多啲相,多啲Selfie呀...哈哈哈~
 

2017年10月16日星期一

【生津清熱】竹蔗茅根馬蹄水

15 October 2017(SUN)

竹蔗茅根馬蹄水我都真係煲過好多次,絕對係兩父子嘅至愛頭幾位,我記得幾年前我都曾經出過分文章分享。

點解今次又再出?因為買材料時姨姨教左我一個新方法,煲出嚟會甜啲又可以出味啲,所以就等我又寫下文(順便拍下片呃下文啦...哈哈哈)~

2017年10月15日星期日

【暢玩單車樂】屯門交通安全城

14 October 2017(SAT)

今晚約左公公..舅父去屯門食晚飯,見有時間就帶小小豬想去好耐嘅屯門交通安全城玩下啦~

2017年10月13日星期五

【滋陰潤肺】蟲草花雪耳螺頭瘦肉湯

13 October 2017(FRI)

終於感受到秋天嘅涼意,一踏入秋天就總係諗起雪耳,依家初秋天氣都帶點乾燥,而且早晚溫差都好易令人生病,所以都要煲多啲滋陰潤肺同埋提高身體免疫力湯水,所以就煲蟲草花雪耳螺頭瘦肉湯啦~
 

雪耳係滋潤相信大家都知,螺頭就有滋陰補精、清熱去濕功用,蟲草花有滋陰潤肺功效,又可潤澤肌膚。所以依幾樣材料就好啱秋天。

2017年10月12日星期四

【滋陰潤燥】玉竹百合雪梨茶

12 October 2017(THU)

尋日係一個網上平台嘅健康專欄介紹幾款入秋嘅滋潤飲品,雖然幾款都好吸引,但我就對其中一款滋陰潤燥嘅玉竹百合雪梨茶最感興趣,簡單得嚟最好就係屋企有齊晒材料,所以就即刻走入廚房,開工煲涼茶等小小豬放學返嚟飲~ 
 
百合有潤肺同清心安神作用;玉竹就能養陰潤燥;雪梨就潤肺去燥、清熱化痰之功效,特别適合秋天食用。(網上資料) 


2017年10月10日星期二

【有營養兼健脾胃】南瓜蕃茄洋蔥湯

10 October 2017(TUE)

話說前幾日同好姊妹飯局,席間上佢送左半個自家制嘅南瓜俾我,叫我用嚟煲湯俾小小豬飲。咁.....即係其實收禮主人翁係小小豬先真啦.....哈哈哈! 

好姊妹一番心意,我就當然好好珍惜兼好好地諗下用嚟點煲俾小小豬飲。經我上網睇過好多唔同嘅南瓜食譜之後,就決定攪攪新意思,嚟一個有營養之餘仲可以健脾胃嘅南瓜蕃茄洋蔥湯啦!
 
我一向都係煲開中式湯水俾小小豬飲,西式湯就係第一次,不過見個食譜都係好簡單,所以就試一試,希望啱小小豬口味啦! 

南瓜有補中益氣及生肝氣作用;蕃茄有生津止渴及健胃消食功用;洋蔥有潤腸,理氣和胃,健脾進食,溫中通陽,消食的功用,對食積納呆、宿食不消很有幫助;豆漿就係由黃豆研磨而成,黃豆可健脾益氣,養血寧心,增強體質,對於瘦弱、乏力有幫助。(網上資料) 

2017年10月7日星期六

【清肝明目】羅漢果黃豆夏桑菊茶

7 October 2017(SAT)

雖然我都成日煲唔同款啱節氣嘅涼茶,不過依隻豬仔唔知係咪俾我寵慣左,如果有一日屋企冇涼茶飲佢就會投訴,有時都真係唔知好嬲定好笑。

為左唔好令小小豬失望,所以我屋企都一定會有好幾包大路涼茶,當我唔知煲咩時都可以頂一頂。 夏桑菊都係我常煲嘅一款,正當我去藥材店執定幾份材料看門口時,店主叔叔就教我煲左依個羅漢果黃豆夏桑菊茶,比起普通嘅夏桑菊效用多啲啲之外,最好就係加埋紅蘿蔔同黃豆一齊煲就可以令涼茶更加甜,所以小朋友都應該會好鐘意。

哈哈哈...有人教煲新嘢就當然即刻跟住嚟煲下啦~
 

2017年10月6日星期五

【健脾開胃】番茄薯仔紅蘿蔔石崇魚湯

6 October 2017(FRI)

雖然煲魚湯嘅工夫係做多好多,不過我都仍然好鍾意煲魚湯,除咗小小豬鍾意飲之外,其實魚湯都真係好啱小朋友飲,因為魚類含有奧米加-3脂肪酸和優質蛋白質等多種人體所需營養素,所以飲多啲魚湯就自然有多啲營養。唔同魚亦都有唔同嘅營養,而且係需要適量進食唔同魚類,所以我平時多數煲三文魚、紅衫魚、青根、大眼雞魚、梭羅魚。今日聽店主姨姨介紹,又學識煲多一種魚,就係石崇魚啦! 

石崇魚唔係成日有得買,姨姨話佢今批石崇魚好新鮮,所以就介紹俾我。其實如果唔係姨姨講我都唔敢買嚟煲,因為佢個樣又真係怪怪的,不過佢很醜但原來係超有益,佢嘅營養價值很高,有生津、潤肺同埋養顏功效。如果產後或手術後,加一啲中藥材嚟煲石崇魚湯仲可以加強免疫力,同埋幫助傷口恢復(網上資料)

第一次煲石崇魚湯都唔搞咁多,就簡簡單單煲個健脾開胃嘅番茄薯仔紅蘿蔔石崇魚湯~

2017年10月5日星期四

【車迷控出動】食盡玩盡TOMICA

5 October 2017(THU)

話說小小豬係一名車控(最迷戀就係火車),唔覺意口多多話俾佢知有一間新嘅主題餐廳,入面有好多TOMICA食物就係咁......我地就嚟朝聖啦! 

我地三口子又點可以食得晒咁多美食,但睇網上介紹每一款都係好吸引,所以我地就約埋SY哥哥齊齊嚟,人多啲可以食多啲唔同款嘛~



2017年10月4日星期三

【有營靚湯】蕃茄薯仔黃豆湯

3 October 2017(TUE)

今日等接放學時,又同啲媽媽齊齊傾傾計,所以我又學識煲一個快靚正嘅有營靚湯,所以即刻去買材料煲俾依個蕃茄薯仔黃豆湯俾骨瘦如柴嘅小小豬飲啦~

其實我都知道小小豬係屬於又瘦又矮,不過我嘅定點位係小朋友最緊又冇病冇痛,健康生活就可以,我始終覺得會隨住佢慢慢成長,就會慢慢變成得高大,好似佢舅父咁..哈哈哈。

2017年10月3日星期二

【做個小礦工】鞍山探索館 - 鞍山旮旯墟

1 October 2017(SUN)

話說大半年前小小豬睇THINK BIG節目時,其中有一集係介紹鞍山探索館,佢見到節目入面嘅小朋友學做一個小礦工,佢都不知幾有興趣,仲叫我帶佢去玩。難得小小豬有興趣,我當然好樂意帶佢去玩,不過原來參加活動係需要自行組團,每團最少都要10個人,所以就冇得去玩了。 

見佢地將會舉行「鞍山旮旯墟」,有得報名參加礦工學堂同埋導賞團,正正係小小豬最想參加兩項活動,所以就即刻登記報名,帶小小豬嚟體驗做個小礦工半天啦~

2017年9月30日星期六

【清潤滋肺】龍脷葉紅蘿蔔湯

30 SEPTEMBER 2017(SAT)

每日最苦惱莫過於行街市但又唔知買餸好,正當我諗緊煲咩湯時,見店主今次返咗好多龍脷葉,新鮮得嚟又幾靚,所以就買嚟煲湯俾兩位老細飲~
依家已經係入秋,好啱飲一啲清潤又潤肺嘅湯水,雖然龍脷葉一般係用作止咳,但唔係咳先可以飲,有時都要預防於未然嘛! 

2017年9月27日星期三

【開胃消滯】洛神花山渣玫瑰茶

26 SEPTEMBER 2017(TUE)

上次我煲過洛神花蘋果粟米茶(按此重溫),小小豬都幾鐘意飲。嚟緊中秋節都應該會食好多月餅,所以我都嚟個開胃涼茶升級版,用洛神花加上山渣同埋玫瑰,等兩位老細可以開胃又消滯啦~