2017年2月4日星期六

【澳門親子之旅】NON-STOP瀡不停@狂歡雪地嘉年華

1 FEBRUARY 2017(WED)

我地年三十晚先由準澳門回港,估唔到咁快又再搭船過去。哈哈哈...其實係因為我地應邀嚟澳門威尼斯人參加首個真雪嘉年華 -  狂歡雪地嘉年華!

由小小豬知道有得同SY哥哥一齊去玩雪時,佢都不知幾期待,終於等到可以瘋狂玩樂大放電啦~

小小豬點解咁期待?當然係可以同佢最好朋友SY哥哥一齊玩之外,都仲有另一個原因。話說我地原本計劃左聖誕節時去北海道同小小豬去玩雪,一切都準備就緒,點知一個電郵話機票有問題,我地嘅玩雪之旅就泡湯了。。(話時話,可能一切都係上天安排,今年聖誕北海道大風雪,如果我地去咗嘅話,分分鐘濟留機場乜都冇得玩……哈哈!) 


冇得去北海道玩雪,小小豬或多或少都有啲失望,所以當佢知道有得去澳門玩雪時,佢團火又再過嚟啦!

初時以為玩雪會好似冰雪展要著兩件羽絨都覺得凍,所以就即刻上官網睇,見佢拍攝片段中小朋友都係著一件褸就OK,所以我都唔帶太多衫,同小小豬一人一件羽絨就出發了!

小小豬一嚟到已經好心急要去玩,不過鐘意影相嘅我就當然先捉小小豬嚟影張主角相先,所以依隻衰豬就十萬個不願意地應酬我~
 
一話可以開始玩,二個小朋友異口同聲話要先去「浪漫雪園」(5個代幣可玩20分鐘),因為可以係雪地裡不停跑、跳、瀡嘛! 

進入雪園前就先要穿上膠雪橇,咁就可以係入面行得安全啦~

「浪漫雪園」就係一個雪地可以俾大小朋友係入面狂玩雪呀~
 
等左一陣,我地等左一陣,終於可以入去玩。兩個小朋友就一支箭衝去玩啦~ 
 
場內有大量雪板及雪仗可以借用,不過兩個小朋友就先嚟邊剷雪邊拋雪球~
 
之後小小豬就走去瀡雪板,今次終於感受到PAT仔細細嘅好處,因為小小豬個PAT PAT比雪板細,所以佢都好容易坐係雪板上。我教左佢一次之後,佢就已經可以瀡去自如啦....哈哈哈~
 
之後我地就轉戰另一邊,因為有噴雪效果出現,好有FEEL呢~
 
咁有FEEL嘅事都好似唔啱小小豬,佢都係比較鐘意後面個拋雪球多啲。不停用啲雪嚟整雪球嚟拋,玩到成對手都凍冰冰,不過有得玩佢又點會覺得凍,最緊要係拋中50分哦~
 
拋完雪球又嚟瀡過,總之佢一見有小雪坡就走上去瀡,真係俾佢激C~
 
不過見佢玩得咁開心,玩到瞓晒係雪地上,就連條內褲仔都濕哂,所以都隨他吧,玩係要盡慶嘛~
 
之後我地就去玩「極速真雪滑梯」(18個代幣可瀡一次)~
 
原本小小豬都好想去瀡,不過因為小小豬未夠120cm唔玩得,所以我就自已去瀡啦~
 
抱住個大大水泡之後行上高台,其實都真係攰多過驚,不過坐係水泡內等工作人員推嗰一刻,都真係驚驚地呀~
 
瀡落去都應該只有2-3秒,我只係記得我瀡落嚟一刻都真係好刺激~
 
我連啲雪都俾我鏟起,超有速度感,我都忍唔住玩左三次呀....呵呵呵~
 
等左我咁耐(其實都係幾分鐘),小小豬又嘈住要去玩了,所以我地就去玩「越野滑雪賽道」(8個代幣可以行一個圈,最多5分鐘)~
 
其實依個遊戲都真係好簡單,只係穿上滑雪鞋係賽道上行,基本上全部都係直路,最多只有兩個小小嘅斜坡,所以小小豬都話冇難度呀~
 
不過依隻豬仔好似鐘意玩雪多過行都賽道,佢行行下仲專登跌係雪上,目的就係玩雪球呀~
 
唔洗5分鐘就行完一個圈,我地會唔會快左啲啲呢...哈哈哈~
 
玩完雪就俾兩個小朋友見到場邊嘅6個攤位遊戲,當然愛玩嘅佢地都即刻衝埋去玩返轉。不過每局都只係$10,而且又唔難玩(連小小豬都可以靠自己中到小禮物,就知有幾易啦....哈哈哈),所以又玩一陣啦~
 
又話有四大遊戲,仲有一個係咩呢?咪就係最新「VR滑翔傘」(18個代幣玩一局)~
 
不過因為小小豬又唔夠高,我又對VR遊戲興趣不大,所以我地就派出大仁去玩一轉啦。大仁話玩到成個人懸空離地,真係好似飛左上天,好正哦~
 
玩到攰就係時候休息下,大仁仲請食爆谷,有得食小小豬又點會唔開心呢~ 
 
不過其實唔止爆谷,場內都仲有好多其他種類,有飯、蛋糕、雞脾、燒賣、點心......總之就可以食飽飽再玩過啦~
 
唔覺唔覺我地又玩左幾個鐘,如果我地唔係趕船返香港,兩個小朋友都可以繼續玩,因為佢地玩得開心到完全唔想走呀!

老實講即日來回又真係帶點辛苦,今次好在有大仁一家同行照顧我地兩母子,如果唔係我想我都一定散晒先返到香港呀!

不過經過今次,小小豬明顯更加鐘意玩雪,返到香港不停同DADDY講有幾好玩,又話出年都好想再去玩雪,叫我地再帶佢去,睇嚟心軟的DADDY明年都會再PLAN去玩雪之旅啦!

More information :
狂歡雪地嘉年華
日期: 即日-2017/02/14 
時間: 11:00-22:00 (Ticket Anyday) 
地點: 澳門威尼斯人 - 金光會展E館 
票價: $999,$180,$120 

VIP $999
1) 不設時限 /附特快通道
2) 浪漫雪園、狂歡滑雪道、越野滑雪賽道
VR體驗(各2次)

成人門票 $180
1) 有效時限為4小時
2) 包8個代幣 

兒童門票 $120 (身高不超過120CM )
1) 有效時限為4小時
2) 包8個代幣


* 三歲以下小童可免費入場





 **我地的FACEBOOK PAGE,齊齊來交流親子。育兒。烹飪啦**Picture

 

沒有留言:

發佈留言