2017年2月17日星期五

【愛心午餐】小小豬的第五周愛心便當

17 FEBRUARY 2017(FRI)

每星期最自我感覺良好嘅文章又嚟,因為又到左紀錄小小豬嘅愛心便當時間又到啦~

其實依個星期我真係煮得好辛苦,辛苦嘅唔係諗煮乜,而係我依個星期都係病病狀態,病住嚟煮飯,之後又拎去學校,都真係十級辛苦。 


好啦....我呻完啦...就等我分享今星期嘅便當啦。

星期一就係我病發第一日,基本上我都真係連起身都唔可以,老公見我咁佢就請左半日假帶我去睇醫生,之後就由我口述,佢就係廚房煮依個簡單嘅豬豬通心粉,所以其實依個係老公出手嘅愛心便當嚟呀~ 

瞓左一整日,都叫做好返少少,不過食藥食到傻傻下,所以星期二就煮左個白汁雞皇飯就算了~   
 
星期三就煮左一個小朋友版麻婆豆腐,依個餸小小豬都好鐘意食,所以我都成日煮,小小豬一見到就當然係非常啱食啦~
 
星期四見有返少少精神,所以就整個兩個熊仔飯團,再煮粟米芯炒雞柳做餸。其實個樣我都覺得麻麻地,不過我諗住整左就算~
 
點知小小豬放學第一時間係話「媽咪你唔舒服都整便當便我,真係好開心呀,錫晒你呀」,聽到個傻仔咁講,真係由心甜到出嚟呀! 

尋日俾小小豬逗得非常開心,所以就整壽司俾佢食,當係獎勵啦~
 
今個星期都只係超簡單地準備便當,完全冇心機諗要點整,所以話全職媽媽一定要好好保養自己,因為病起上嚟冇人可以幫你嘅同時,仲要點辛苦都一定要去做,你都咪話唔辛苦呀!

 
**我地的FACEBOOK PAGE,齊齊來交流親子。育兒。烹飪啦**https://www.facebook.com/kinseymama/

沒有留言:

發佈留言