2017年2月22日星期三

【舒緩咳嗽】紅糖薑茶

22 FEBRUARY 2017(WED)

唔知係咪依排一早一晚都有啲涼風,所以一向氣管唔多好嘅小小豬都會早晚都會咳。咁佢嘅咳又唔係話好嚴重,但一聽到佢咳得密密時,都總係帶點心痛。

原本打算去買桔餅煲湯俾小小豬飲,不過同學仔媽媽就介紹左我一個快、靚、正方法,屋企又有齊材料,所以就試下煲依個紅糖薑茶啦~
 
其實我都知小小豬唔係病嗰一種咳,可能係早晚溫差開始轉大,俾風吹入身體(尤其係頸部,所以要好好為頸部保暖呀),再加上平日又多食生冷嘢,所以就引起咳嗽誘因。

紅糖薑茶就可以保暖身體及止咳平喘,而且都只係用屋企都會有嘅簡單材料就得,最好就係時間唔耐,只係需要15-20分鐘就完成。 

依個係一份量材料:生薑3片、陳皮1角、紅糖少許~
 
陳皮浸軟刮去皮瓤;薑去皮切片(由於唔係每個小朋友都受到薑嗰一種味,所以切薄片就好啦)~ 
 
煲內放約1.5碗水~ 
 
然後隨水加入所有材料~ 
 
見水滾後就即轉用慢火~ 
 
之後轉慢火加蓋煲多15分鐘~ 
 
可以因應個人口味,加入適量嘅紅糖(唔好為左令小朋友飲就加多啲糖,因為太甜的話就會"張"喉,咁就會仲咳多啲。建議落1茶匙多少少啦)~ 
 
最後焗大約5分鐘,等啲糖溶左之後,就可以飲得啦~
 
雖然係帶有少少薑味,不過味道就唔會好濃,所以小小豬都唔抗拒呀~ 
 
當然第一次煲我就同小小豬分甘同味,我都飲一半試下,飲落就有啲似蕃薯糖水嘅味,但就甜多少少。飲完之後個身體又好似由內暖出嚟,而且都可以成晚唔會感覺到凍,唔知關唔關事呢!

小小豬又好似明顯係咳少左,起碼瞓著左都冇咳醒,同埋早上起身咳嘅密度又好似平日少左,我諗依個紅糖薑茶對小小豬都起左少少作用呀!


溫馨提示:由於個別人仕體質不同,所以大家記得煲之前了解下自己,如有疑問,請先向註冊中醫查詢! 




**我地的FACEBOOK PAGE,齊齊來交流親子。育兒。烹飪啦**
Picture


沒有留言:

發佈留言