2017年2月23日星期四

【潤肺防咳】海底椰蘋果茶

23 FEBRUARY 2017(THU) 

屋企有兩粒大大嘅蘋果,見到佢地就總會令我諗用嚟煲涼茶,於時我就買埋海底椰再加埋鮮百合,就煲一個海底椰蘋果茶啦~

海底椰同鮮百合一樣都係有止咳潤肺之功效;蘋果可以潤肺、生津解毒及益氣和胃,所以三樣加埋就可以潤肺防咳。最好就係煲出嚟係超級清甜,真係大人同小朋友都啱飲呀! 

材料:蘋果兩個、海底椰一両、鮮百合兩球、無花果四粒及南北杏一湯匙~
 
蘋果刮去表面嘅果蠟之後去芯切細塊;鮮百合切去頭尾啡黑色部份,逐塊剝開洗淨;海底椰、無花果及南北杏浸洗一陣~
 
將3L水煲滾,然後放入所有材料~
 
待煲滾後,用大火加蓋煲約15分鐘~
 
最後轉慢火加蓋煲多30分鐘~
 
隔渣後就可以飲得啦~
 
由於煲湯蘋果係好清甜,再加埋無花果同埋煲溶晒嘅鮮百合,所以入口都帶點清清甜甜又又唔會過份甜度,所以都幾啱一家大細飲用。當然小小豬又點會唔鐘意,轉眼間就飲晒一整杯,仲要求我下次再煲添呀! 


溫馨提示:雖然各種食材都係好溫純,不過始終個人體質都有所不同,我啱飲時又未必每個人都啱,所以大家記得煲之前了解下自己,或者問下相熟中醫/藥材店職員,呢個湯料啱唔啱自己呀!



**我地的FACEBOOK PAGE,齊齊來交流親子。育兒。烹飪啦**https://www.facebook.com/kinseymama/

沒有留言:

發佈留言