2017年4月8日星期六

【有機菜新食法】金御有機粵菜

6 APRIL 2017(THU)

冰鎮西蘭花....麻醬油麥菜....聽個名就覺得好幾得意,所以今日就跟住SUPERMAMI嚟試下有機菜嘅新食法啦~
 
坊間都有好多唔同形式及種類嘅有機菜,「金御」所用嘅又有咩唔同呢?原來佢地得到美藉華裔腦科博士協助,更親身遠赴無污染嘅高山搜索最合適嘅水源及食材,所以各種有機蔬菜係水源及技術上都可以得到國際認可,而且各款有機菜每日都供應有限,食嘅時候都會放心啦! 

先嚟前菜 - 陳醋有機洋蔥貓耳仔~ 
 
坦白講,初時我都有少少擔心,因為我都唔係太鐘意食生洋蔥,好怕佢嗰一陣味。不過依個又真係令我有點驚喜,入口甜甜地口感又爽,加埋貓耳仔(即木耳)一齊食都好夾,所以失禮地我都食左大半碟呀! 

即燒有米奶豬~
 
米奶豬即係BB豬仔,下層就係滿粒粒嘅炒飯~
 
依個豬仔入口都好嫩,而且一啲都唔肥,就連啲骨都可以食埋添呀~
 
頭抽煎南非鮑魚~ 
 
佢個味道剛剛好,鮑魚入味之餘而且仲非常煙煙韌韌添~
 
麻醬油麥菜~
 
油麥菜平日我都係用嚟炒豆豉鯪魚,原來簡簡單單只係將油麥菜洗淨,然後加入麻醬一齊食都可以。生食嘅油麥菜原來係咁爽脆,加埋麻醬一齊食就可增加油麥菜嘅甜味,真係有驚喜呀!

鰻魚汁燒原條茄子~ 
 
茄子就好似一隻船仔,入面又裝滿茄子同埋海鮮配料,視覺同味覺都唔錯呀~
 
金銀蒜香辣澳洲泥蟹~ 
 
初時聰個名就以為係會勁辣,但原來都只係帶點點微辣,少少嘅刺激口感就加添蟹嘅甜味,而且佢嘅肉質都好滑,最重要係....個蟹鉗好大隻呀~
 
蒜炒白菜仔~ 
 
另一款有機菜式,比起之前兩款涼拌款式,今次就以香蒜嚟炒,炒過嘅白菜仔都依然好嫩,而且爽爽地都好食呀! 

南瓜鮮竹秀珍菌~
 
依個餸可以話係可以由內食到外,南瓜盅內都已經有好滿滿嘅炒什菌,外面嘅南瓜都好甜,食得好健康呢~
 
順德煎焗魚嘴~ 
 
依家都比較少地方有得食魚嘴,所以都有點期待,以煎完再焗嘅方法,令到個魚嘴可以脆脆地之餘,仲好入味添!

米網蟹子明蝦球~ 
 
以蟹子做醬再同埋蝦球一齊食,其實都幾得意,不過我個人覺得,如果可以再多啲蟹子,咁入口時就可以有卜卜爆珠嘅感覺,我諗應該會更加吸引呀! 

台南三杯排骨煲~
 
以三杯酒煮法嚟煮排骨,排骨吸晒啲味,而且入口仲非常嫩滑,同場嘅兩歲僑僑都密密食唔停口呀!

 金牌鹽焗雞~ 
 
依個係店內其中一個招牌菜,因為係以鮮雞去製作,而且每日供應有限,若唔想去到時已售罄而失望見議提早預訂。以鹽焗方式再烤雞方法處理,所以就可以做到外脆內軟嘅效果。入口時仲有點點微溫,所以都值得推介呀! 

冰鎮西蘭花~
 
先將西蘭花灼熟再放冰水冷凍,單看賣相都已經勁吸引。再配以少少芥辣一齊食,爽脆得嚟又帶少少鮮甜,估唔到西蘭花都可以食得咁出色呀~
 
北菇黃油雞煲飯~
 
以依個煲仔飯作結尾,剛剛煲好就送上,所以熱辣辣嚟食,都份外好味。不得不提那個飯,配以秘製靚煲仔飯豉油,真係特別滋味呀~
 
最後嚟個芒果有甸,真係極度滿足的一個晚上呀~
 
今日食左一個超級豐富嘅晚餐,平日中菜都俾我好例牌嘅感覺,即係食嚟食去都係嗰啲款,不過原來中菜都可以好多變化,而且又有有機菜,真係食得健康,而且價錢都合理所以嚟緊母親節...父親節...等等,都可以約屋企人嚟食哦~
 
More Information :
金御海鮮酒家(中環店)
中環皇后大道中88號勵精中心3樓
預約電話:2525 1333

 
**我地的FACEBOOK PAGE,齊齊來交流親子。育兒。烹飪啦**https://www.facebook.com/kinseymama/

沒有留言:

發佈留言