2017年7月23日星期日

【北海道親子之旅】搭JR開始去玩啦

15 JULY 2017(SAT)

第一日嘅北海道之旅,其實都可以話係冇左半日時間,為左爭取時間就當然一落機就即刻搭JR去玩啦~


依個小小豬一落機就話帶我地去搭JR,其實佢都只係因為刨左好多次旅遊書就當正自己好識路咁。不過估佢唔到又真係幾好記性,真係記得晒條路點行呀~
 
買埋車票就可以向扎幌出發啦~
 
小小豬平日都係一名火車控,今次第一次搭JR都好似好新奇,全程都望住窗外風景呀~
 
返到扎幌我地第一時間就去酒店CHECK-IN,安頓好晒之後就去食晚餐。其實我地時間都唔多,去旅行係應該休閒啲,所以就近近地係附近嘅商場食就算。 

唔好以為近近地就冇好嘢,表妹仔就帶左我地嚟依間好出名嘅店食烤豬扒飯~
 
其實我地當時都只係六點左右間,不過已經要排隊啦。趁等緊嘅時候就當然周圍八卦啦~
 
企定定睇師傅烤豬扒,睇見都覺得好食,我仲見到師傅用風筒嚟控制個火喉,勁攪笑呀~
 
等左大約半個鐘就有位啦~

其實成間店都係食豬扒,只係分數量同大少,所以好快就己經可以ORDER晒。小小豬要求飲麵豉湯,所以就叫左一碗俾佢。

我地係香港飲開嘅都係淡淡地,嚟北海道又真係有少少唔同,入口唔似係沖水嗰啲,啖湯好濃而且又多配料呀~
  
我地嘅豬扒到啦~
 
我地都只係ORER普通SIZE,不過啲豬扒份量又幾大。啲豬扒看似有點乾,但佢入口又真係好淋,而且配埋佢地啲汁一齊食,都真係唔錯,都抵我地排咁耐食依一餐~
 
小小豬都話好好食,話咁快就KO晒啦~
 
食飽飽就當然係要行下商場,就係咁....小小豬就有左佢嘅第一次,可以玩遊戲機中心打機啦~
 
依個傻豬仔平日都冇打開機,不過一見到孖寶賽車雙眼就好似發光咁,可能係佢上次同SY哥哥玩過手機版,所以一直念念不忘。嚟旅行都係輕鬆,所以就俾佢玩兩局咁多,等佢開心下啦~
 
唔知幾時佢又開始鐘意孖寶,所以....陪佢影張相啦~

估唔到北海道啲商場係八點半就開始CLOSE,所以我地都冇得行太耐,要返回酒店啦! 

不過唔緊要,我地聽日都有好多活動,所以早啲休息都係一個唔錯選擇。




 

沒有留言:

發佈留言