2017年10月29日星期日

【野外定向比賽】生態捍衛戰2017

29 October 2017(SUN)

由我地正式報名開始,小小豬非常期待今日嘅來臨,因為可以正式參加生態捍衛戰2017野外定向比賽,今次佢仲負責教DADDY去玩,所以佢又點會唔興奮呢~

話說上次我就責任重大,因為我同小小豬都係第一次接觸,係我唔太識玩嘅同時我又要教/照顧小小豬,所以嗰日就真係攰都冇朋友。不過今次有DADDY同行,所以佢兩父子就主力去搵CHECK-POINT,我就只係負責後勤跟住嘅工作,即刻成個人都輕鬆晒。 

今日我地參加活動地方就係大潭郊野公園(寶馬山),其實依度真係俾左啲啲回憶我,雖然之前都冇嚟過依個山,但因為我中學年代都成日去附近個商場食午餐,所以途經嘅車程望到好多熟識嘅地方,都令我回想起那些年呢!

哈哈哈....唔係度老人講舊事,講返正題先。 一早我地就嚟到登記,遠望都已經見到好多參加者,場面好有氣氛呀~ 
 
準備出發嘅小小豬係咪好神氣呢~
 
開幕禮就有唐寧同埋王梓軒添~  
 
開幕禮完畢之後,我地就跟住大會工作人員去起點準備出發啦~
 
一夠鐘小小豬就一支箭咁跑去搵CHECK POINT啦~
 
又上山...又行樓梯...又急步跑,小小豬終於搵到第一個CHECK POINT(可憐的媽媽...我仲仍然係山腳下慢慢行緊)~
 
經過一輕衝..衝....衝,小小豬終於都用左大部分體力,終於肯慢慢停下休息一陣,然後等埋我一齊邊行山,邊搵CHECK POINT啦~
 
一見到啲CHECK POINT就會飛到去啦~
 
雖然小小豬看似有點攰,不過佢地好努力咁去搵呀~

 
兩父子齊齊好努力咁邊睇地圖邊搵路,其實兩個都係識少少扮代表,有時又會各持己見,場面都真係幾攪笑(當然最後都係聽DADDY指示啦)~
 
搵啱路就一步步向目標進發~
 
我地仲搵到火燭鬼,當然唔少得嚟一個集郵啦~
 
雖然我地都係比賽緊,係需要限時完成,不過見到咁靚嘅景色就當然要停一停,欣賞下啦~
 
經過溪邊,小小豬又話要感受下冰涼嘅山水添~  
係我地比賽途中,我地仲見到王梓軒,估唔到佢認得小小豬,仲主動提出同我地照合照留念(因為怕影響佢比賽,所以唔敢)。我都話.....叫得"軒"都係靚仔又nice!(又有人曲線讚自己個仔)~
 
今次全程有18個CHECK-POINT,雖然最後我地都係搵唔齊,佢地兩父子好努力咁邊睇地圖邊搵路,所以都叫有交待,話哂第一次參與,體驗享受過程先係最重要~
 
但...其實我地冇搵最後三個CHECK-POINT係有一個小秘密,事緣當我地準備繼續向前行時,小小豬突然話肚仔有少少唔舒服,需要去"大大",咁...山路沿途都唔會有洗手間,我地亦做唔出啲不雅嘅行為,雖然小小豬都有一刻係話要堅持忍到去終點,不過愛豬號DADDY考慮過之後,都係決定沿途行返出發點,之後帶小小豬去洗手間最為安全,就係咁....我地就MISS左三個CHECK-POINT了! 

雖然搵唔齊CHECK-POINT小小豬係有少少失望,不過唔緊要啦....咁突發事又真係冇人預計到(事前都已經叫佢去晒洗手間),都叫做情有可原呀。

有左今次體驗,小小豬話佢下年一定要再嚟參加,到時一定可以完成整個賽事!(好...下年佢記得嘅就再報名同佢參加啦....哈哈哈)


 

沒有留言:

發佈留言