2017年12月12日星期二

【滋陰清熱】花旗參麥冬茶

12 December 2017(TUE)

依排少左煲涼茶,並唔係因為我懶左,只係多左焗茶嚟飲,簡單得嚟又可以密密飲暖暖地嘅茶,啱晒依家凍凍地嘅天氣。

睇報紙見到個滋陰清熱生津又可以滋潤嘴仔嘅焗茶,又似幾啱嘴唇成日乾裂嘅我同小小豬,所以趁屋企有齊材料,就試下焗依個花旗參麥冬茶啦~

花旗參有益肺陰,清虛火,有生津止渴之功用;麥冬有助養陰生津,潤肺清心;糖冬瓜就有益腸利尿、消腫化痰功效(網上資料)。

材料有花旗參3克、麥冬10克、糖冬瓜2條同埋將所有材料放入保溫瓶~


將花旗參及麥冬稍微沖洗一下~


然後將所有材料放入保溫瓶~

加入熱水,蓋上杯蓋焗約15分鐘,不過我想出味啲,我就焗左30分鐘先飲~


焗完就可以飲得~ 

焗完一杯之後,可以反覆加熱水沖泡,可以有繼續飲,直至味道變淡為止~

我用依個分量飲左一個上午,都可以話KEEP到四杯左右。當然我都有試下俾小小豬,估唔到佢都肯飲,雖然唔係話大愛嗰一隻,不過都係乖乖冇投訢情況下飲左一杯啦~ 


其實之前我都曾經煲過花旗參湯或者涼茶,不過小小豬飲左一啖之後就點都唔肯再繼續飲,可能就係嗰一種參味,所以唔鐘意啦。

今次肯飲就可能係有糖冬瓜關係,甜甜地又蓋到花旗參味,所以好飲好多.....其實我自己都覺得幾好飲呀!  

報紙介紹仲話建議一星期飲用二至三天,連續二星期為一個療程。既然小小豬唔抗拒,做法又簡單,咁就多啲焗潤下個嘴仔啦! 



馨提示:
 - 由於個別人仕體質不同,所以大家記得煲之前了解下自己,如有疑問,請先向註冊中醫查詢!






沒有留言:

發佈留言