2018年1月27日星期六

【做個賀年小廚師】零失敗蘿蔔糕@奇華工作坊

27 JANUARY 2018(SAT)

一踏入農曆新年月份,就會見到好多朋友仔分享佢地嘅自家制賀年糕點,一見到佢地嘅作品,總係令我都好好想試下自己整,但老公一聽到就會話:唔好整啦...買仲方便又好食(聽到佢咁講真係好想樁佢幾下,咩心情都冇晒啦)

不過今日終於可以一試自己親手製作賀年糕點嘅滋味,謝謝奇華邀請我地參加蘿蔔糕工作坊,原來整糕都係一件好簡單嘅事呀~

其實小小豬一向都有同我齊齊整嘢食所以當佢知道可以嚟整親子班時,佢都不知幾興奮,仲不停問究竟蘿蔔糕係點整?會唔會好難整?要用啲咩材料?要整幾耐?總之又係嚟問題少豬上身般。不過....佢肯問就即係代表佢好期待啦~

我地嚟到就見到各位工作人員好忙碌為我地準備所需要嘅食材同工具啦(辛苦晒呀)~

哈哈哈..今日小廚師又好似幾醒目哦(希望一陣唔好攪攪陣冇幫襯啦)~

係我地開始之前,就當然乖乖聽聽導師為我地示範啦~

小小豬仲主動舉手話要幫導師手刨蘿蔔絲添~

導師真係好詳細又有耐性,依個問題少豬不停問,佢就慢慢咁講解,真係超專業呀~

睇完導師示範,就當然到我地動手做啦

首先就將啲臘腸臘肉切粒,導師都好貼心,為小朋友準備左剪刀,咁就可以有得參與之餘,又可以顧及安全將啲臘腸及臘肉切好之後,就可以加埋啲蝦米一齊,然後水波爐焗5分鐘~

依個時候就要將蘿蔔切成片狀,揸刀其實我都唔太想俾小小豬做(因為佢又真係超級論盡的人嚟),不過佢又主動話會小心慢慢咁去切,加上我亦都要學懂適當時候放手俾佢試,所以就....係我視線範圍安全情況下俾佢試一試啦~

將完成嘅去蘿蔔片同埋導師為我地準備左啲蘿蔔絲放係烤盤上,再放入水波爐焗15分鐘~

之後我地就將導師為我地準備好嘅粘米粉...粟粉...澄麵等材料混合好~

再將已焗好嘅蘿蔔同臘腸等材料加入粉漿內,然後就可以倒入糕盤內~

最後就蒸焗佢70分鐘就大功告成~

係等嘅時候導師仲即場示範整黃金馬碲糕~

見師傳三兩下手腳就完成,好似好易咁,攪到我都心思思想整埋一份呀~

哈哈哈...有咁好糕點,又點少得試食時間工作人員為我們煎左最新推出嘅金華火腿腰果糕同埋蔗汁馬蹄,仲有我地今次學整嘅臘味蘿蔔~

有得食就最啱為食小小豬,佢不知食左幾多件,當然又係話樣樣都好食啦~

不過我自己就偏愛蔗汁馬蹄,因為真係勁香蔗汁味之餘,又有好馬蹄香,真心推介呀~

見仲有時間就睇下今年新出嘅賀年產品,小小豬仲已經揀好左買咩禮物拜年添~

說時遲那時快,小小豬牌嘅蘿蔔糕出爐啦(睇個樣都幾OK呀)~

睇見自己個完成品,小小豬都不知幾有興奮,不停話自己好叻可以學識整蘿蔔糕~

開開心心就過左一個又好玩又學到嘢,最重要係睇見個完成品真係勁有滿足感呀!今次都真係要俾個叻小小豬,因為佢做得比我仲要多,基本上可以話大部分都係佢自己整,又冇乜論盡事發生,所以都好叻仔啦

當然,我地返到屋企就有個小朋友急不及待要食自己嘅蘿蔔糕,咁見佢咁乖就即刻煎嚟獎勵下佢

往年叫佢食蘿蔔糕,都好勉強咁食半件。但.......今次因為自己整關係,竟然大讚好食,一個人食左半碟,仲叫我快啲去買材料再整過,如果唔係新年冇得食。依隻豬都真係...........唔知好嬲定好笑~

經過今次小小豬咁成功整到好味蘿蔔糕,有個愛豬號DADDY就由反對我係屋企整,到依家都叫我快快手買材料再整過。所以依個百厭豬影響力有幾大呀,不過有得再整我又唔介意呀...哈哈哈


More Information :
Website:https://studio.keewah.com/frontend/web/index.php?r=course%2Fview&id=61





沒有留言:

發佈留言