2018年2月10日星期六

【學做一個消防員】參觀中區消防局

10 FEBRUARY 2018(SAT)

每一次見到有大型嘅消防局參觀時,我都好想同小小豬去玩,不過....一諗起好友提及過佢嘅經驗,都會令我卻步。因為我真係好怕人多又迫嘅環境,最重要係好怕排得隊嚟又冇時間玩,所以次次都係得個想字。

今次就因為DADDY見到有社區中心舉行參觀活動,所以終於都可以同小小豬嚟參觀中區消防局啦~

雖然只係一個小型參觀,不過小小豬一聽到消防局參觀,佢都不知幾興奮,不停問啲消防車係點....消防員救火工具係點...總之就嚟問題少年上身啦~

由於我地係一個小參觀,主要都係由消防員哥哥為小朋友介紹消防車同埋一啲救火點滴~

聽完消防員哥哥簡單介紹之後,就到左今日嘅戲肉,就係睇下三部消防車同埋消防工具。

先嚟就睇下大搶救車啦~ 

大搶救車有整套救援工具及設備,仲有一套重型救援工具,所以係嚴重事故或災難中執行救援行動啦~

消防員哥哥仲即場為小朋友講解幾種常用工具嘅用法添~

當然....最期待嘅一個環節就係戴消防帽啦~

之後到睇下泵車~ 

泵車就當然係為救火時提供水源,最吸引小朋友嘅就一定係水喉出水位啦~

小小豬拎住水喉扮消防員係唔係好型仔呢~

每一部消防車都有唔同嘅工具,今次消防哥哥就介紹啲同醫護有關嘅工具~

最後一部消防車就係升降台~

聽個名就知係負責執行高空滅火同救援工具~

消防哥哥仲同小朋友講下救火時要注意事項,同埋一啲防火小知識~

聽完講解仲有消防哥哥為我地示範著上防煙制服添~

由於只係小參觀,所以我地睇完三部消防車之後,一個半鐘嘅活動就完結了。雖然時間唔算多,不過每個小朋友都滿心歡喜咁離開,因為大家都對消防車認識多左。當然小小豬亦都唔例外,佢係回家路程不停講返剛才消防員哥哥講過嘅說話,又讚佢地好叻好利害,咁都證明係整個參觀過程小小豬係好留心啦!

不過....問佢想唔想做消防員,佢就話:消防員係好叻,可以救人,但係我都想做醫生多啲,可以醫多啲病人......哈哈哈!
(其實作係媽咪,消防員好...醫生又好,最重要都係做一個有善良同有用嘅人就足夠了)


沒有留言:

發佈留言