2018年3月16日星期五

【清熱潤肺】魚翅瓜蟲草花栗子瘦肉湯

16 MARCH 2018(FRI)

成日聽朋友講魚翅瓜煲湯係好味又有益,不過我都好似未煲過,印象中都只係NNN年前飲過一次。前日路經有機店,係入面見到有好多新鮮魚翅瓜,係店員落力推介之下,我就入手一個,最後就煲左依個清熱潤肺嘅魚翅瓜蟲草花栗子瘦肉湯~

魚翅瓜一直唔敢煮就係因為唔識整,經店主姨姨一教,原來同普通瓜果一樣,洗乾淨切開就可以。佢叫做魚翅瓜就因為煲完之,瓜肉會刮成絲看似魚翅,所以就咁叫,絕對好易整呀!


魚翅瓜屬南瓜種,纖維相當豐富,可以清熱解毒、降血糖、降膽固醇;蟲草花含豐富蛋白質有助滋肺、補腎、護肝、抗氧化、抗疲勞、提高機體免疫能力;栗子養胃、健脾、補腎;紅蘿蔔補肝明目;粟米治療脾胃虛熱、養胃氣、解毒、除煩熱。(網上資料) 

 魚翅瓜(約兩斤)、蟲草花兩両、栗子半磅、紅蘿蔔一條、粟米兩條、蜜棗兩粒及瘦肉$30~

魚翅瓜洗乾淨,然後切件~

粟米去衣切塊~

紅蘿蔔去皮切塊~ 

栗子、蟲草花及蜜棗浸洗一陣~

瘦肉汆水~

煲內放約2.5L水,然後隨水加入所有材料~ 

待滾起時,用大火加蓋煲約15分鐘~

之後轉慢火加蓋煲2小時~

最後加入少少鹽調味,就可以飲啦~ 

第一次煲唔多唔少都有丁點擔心唔知係咩味,不過原來依個配搭煲出嚟又真係唔錯,啖湯係超清甜,又幾好飲哦。兩位老細都喜歡,就等我可以多啲買魚翅瓜嚟煲先得! 

題外話: 有個小朋友一聽到我煲「魚翅」,佢都不知幾大反應,又話我唔愛護環境,又話我殺死鯊魚,仲話唔肯飲添。不過當佢知道原來係煲魚翅...瓜時,佢了解晒成件事之後,就安心乖乖飲湯了。哈哈....依隻豬仔幾時做左一個環保份子,咁都好.....環保係由細做起嘛,等佢繼續保持依個初心啦! 


溫馨提示:
由於個別人仕體質不同,所以大家記得煲之前了解下自己,如有疑問,請先向註冊中醫查詢!



沒有留言:

發佈留言