2018年3月7日星期三

【泡泡..全部都係泡泡】Happy Time in BubbleLand

7 MARCH 2018(WED)

自問我地都唔係怪獸家長,考試其間我地都冇特別谷小小豬,都係一向做法輕輕鬆鬆咁溫下就算,因為人生考試嘅次數何其多,唔好咁快迫佢,等佢慢慢學懂自己去適應考試先係最重要雖然唔迫佢狂溫習,不過我地係考試前嘅星期都冇出去玩,怕佢玩到心散

考完試就要去玩(YEAH....兩母子放監啦),所以今日考完最後一日就帶小小豬去玩返下滿足隻衰豬啦。不過.....好唔好彩我今日作病個頭爆痛咁,真係想去遠啲都唔得,但又唔想令小小豬失望,所以就近近地嚟玩一轉Bubble等佢放少少電啦~

唔知點解我自己好鐘意睇啲Bubble係天上飄來飄去,望見佢地會覺得好自由自在好舒服,所以.....其實有時係公園玩時,我都會同小小豬爭玩Bubble槍,所以其實今日帶小小豬嚟都有少少私心....哈哈哈!

不過,其實小小豬都一樣好鐘意玩,所以佢一聽見嚟玩Bubble佢都不知幾開心BubbleLand同其他PlayHouse有少少唔同,除左只係玩泡泡之外,就係以小朋友每分鐘$1收費(假日$1.5),成人全日$25

我都知依個懶玩豬係唔多識停,所以預先同佢傾好左,玩大約一小時就要走。當然....為左可以去玩就咩都答應我啦~

入場時會先收取成人的入場費,之後小朋友就可以著上大會提供嘅保護雨衣去玩啦~

其實整個場就唔算太大,不過見到一系列嘅跳彈床、踩單車、踩踏板,絕對啱嚟放電,邊做運動邊放泡泡依個又幾得意哦~

仲有一個幾大嘅休息區俾我地嘅家長坐,依個位真係救左我一命,因為我頭痛都爆,其實都冇乜心情,同小小豬拍左幾個短片之後(嗱...係小小豬叫我拍,因為佢真係極度自戀豬,好鐘意睇自己嘅片呀),我就全程坐定定睇住佢同職員姐姐玩~

一嚟到小小豬就二話不說要企上泡泡台上,要變做一個大泡泡哦(真係辛苦姐姐幫佢整左好幾次了)~

之後就當然不停玩踩踏板同埋踩單車,一見啲泡泡出就係咁踏,佢話要變好多好多Bubble出嚟~

當然唔少得跳彈床放泡泡,平日又唔見佢跳得咁高,一見Bubble出就係度狂跳~

依個一拉就會造成一幅泡泡畫咁,其實要好定同慢先做到,依兩方面都係小小豬最弱嘅部分,所以佢都要試好多次先成功。不過咁都好,就當係俾佢一個挑戰同訓練啦...哈哈哈~

依個泵泡泡就最夠又要快又要力嘅小小豬,不過佢竟然話太容易,所以泵幾下就算了(其實佢係留力玩其他)~

依個製泡泡位可以話係小小豬玩得最耐嘅一個,因為唔同形狀就可以有大大小小嘅泡泡,最重要係如果俾心機慢慢整係可以做到好多大泡泡。一向都有帶點好勝心嘅小小豬密密整就係想整一個大泡泡,結果係點.............佢自我感覺良好就足夠,有時又唔好破壞小朋友心目中大嘅定義,佢投入享受就勝過一切啦~

場內定期都會噴出大量泡泡,小小豬就當然不停拍啦,唔知點解小朋友見到泡泡就總係鐘意拍呢(但其實....我都鐘意呀)~

依度仲有一個類似夏水禮嘅泡泡玩,小小豬一見到都不知幾興奮,又嚟好似夏水禮咁將啲泡泡當沖涼般。真係好在有件保護衣,如果唔係我想我都應該要出去買過套衫先可以返屋企呀~

玩左咁耐,係時候都要文靜一下,問姐姐拎張魚圖畫嚟填顏色啦~

填好顏色就可以去依部機掃入大魚缸啦~

話咁快就可以係螢幕大海出現啦~

小小豬都好俾心機慢慢睇慢慢撈,雖然最後都係一條都撈唔到,不過都算佢啦~

話說入場前同小小豬傾好左我地只玩一小時左右,為左測試佢嘅自控力我都冇特別報時不過原來佢都有間中留意場內嘅時鐘,最後小小豬就玩左大約68分鐘就自動自覺提意走了~

小小豬玩的$68,加埋我入場前的收費$25,大約用左$100就玩左一小時,抵唔抵就睇自己個人意見(當然如果一個平平地收費可以全日任玩就最好啦),不過最緊要都係小小豬玩得開心。佢.......就當然係歡喜非常,仲話下次帶Daddy嚟玩哦


沒有留言:

發佈留言