2018年4月21日星期六

【做個安全小乘客】樂在棋中‧港鐵安全體驗天地

14 APRIL 2018(SAT)

因為小小豬係鐵同Board Game迷,一個一舉兩得地方又點會唔想帶小小豬嚟玩呢,所以就膽粗粗申請組團的都係滿足一下依個傻豬仔,估唔到係一個有心有意思嘅活動。唔止玩咁簡單,仲學到好多地鐵知識,小小豬依個超級鐵迷表示玩得極度開心~

其實依一個港鐵安全體驗天地係樂在棋中同港鐵合作嘅項目之,以之前嘅《港鐵沿途有禮》桌上遊戲為藍本,之後引申而來嘅活動。目的就係透過互動學習讓小朋友從小認識乘搭港鐵時應注意嘅安全同埋有禮好行為~

其實小小豬一向都係樂在棋中嘅粉絲,基本上大部分所推出嘅桌上遊戲小小豬都已經齊晒,仲玩得出神入化玩得仲叻過我添。係各種遊戲中佢就當然係最鐘意《港鐵沿途有禮》,佢由初版開始玩到依家第五版,仲成日都自創新開法,所以佢絕對可以講係一名小專家...哈哈哈

小小豬期待左半個月,懷著超興奮心情嚟到青衣機鐵站嘅活動地方,一見到依個超大型嘅「港鐵安全遊」大型圖板佢都已經開始失控了~

除左已經見到大型圖板之外,場內仲有四個港鐵設施模型等小朋友玩下影下相啦~

仲有 「安全有禮月台」攝影區~

好啦...玩左一陣,夠鐘開始工作坊,小朋友們就乖乖入去邊玩邊學嘢啦~

商鋪內都張貼左好多港鐵小資訊~

首先就由導師哥哥同小朋友講解「安全車廂你要知」,除左講大家都知嘅知識之外,仲有同小朋友分享啲港鐵冷知識~

哈哈哈...一講港鐵內容,各位小朋友都聽得好留神哦~

聽完小知識,就開始嚟個「我是乖乖不衝門」手舉標示設計坊,小朋友要自己設計一個停牌~

除左不准衝門之外,只要小朋友諗到啲咩唔可以係港鐵範圍做,都可以畫上去,最緊要就係有創意嘛~

值得一提,小朋友畫完之後導師會將一個小手柄貼係卡紙背後,咁就可以即時出去模擬月台玩樂一返(真係好貼心呀)~

接住就嚟到去「港鐵安全遊」大型圖板,小朋友們化身成為小列車聽哥哥講解港鐵嘅安全指示(哈哈哈...有得扮小列車.....聽都聽得特別專心呀)~

當然有依個大型圖板,又點少得玩下,順便教下小朋友轉車嘅方法同埋應注意事項~

其實.....依一個環節絕對係小小豬最....最.....最期待,平日係屋企玩都已經開心,今次有依個真人加人版仲唔係更加興奮~

不過,原來唔止小小豬,各位小朋友都一樣玩得好投入,所以哥哥就同佢地玩耐啲先去下一環節呀~

接住就到左「勿帶危險品」互動小講座,透過遊戲等小朋友知道有啲咩係唔可以帶入港鐵~

雖然好多小朋友都知啲物品係唔帶得入港鐵,但點解唔可以帶呢,就要乖乖聽哥哥講啦。唔好話小朋友,其實有啲我地大人都未必知呀...哈哈哈~

之後哥哥就到故事時間,依個「扶手電梯安全篇」故事牆都幾吸引,以使用扶手電梯要注意事項做藍本大家都好專心跟住哥哥邊睇邊聽故事呀

仲去左玩「企定定握扶手」3D 攝影區,哥哥仲教我地企係樓梯上層影,係哦...又真係幾3D,好得意呀~

最後我地去整「安全小列車」製作坊,先用紙卡摺成一個盒子,然後就可以自由貼上貼紙,創作出屬於自己嘅小列車~    

小小豬話要用嚟做筆盒,咁就可以日日有列車陪返學(唉...港鐵控又嚟啦...哈哈哈)~

話咁快整個工作坊就完成,除左有得玩、有嘢學、仲有小禮物帶返屋企(仲有自己設計嘅停牌都可以帶走),實在太滿足啦~

雖然唔捨得,不過都有完結嘅時候話咁快兩個半鐘嘅活動就完結見到個個小朋友面露笑容就知佢地係幾咁開心。不過都要辛苦幾位負責哥哥姐姐為小朋友準備好一切教材,又好有耐性咁同小朋友講解呀

港鐵安全體驗天地》主要對象都係K3至小三嘅小朋友,暫時主力安排學校於星期一至五嘅時段開放預約參觀。不過如果家長有興趣都可以自己組團預約由20位起,預約詳情: http://pob.hk/zh/safety-zone.html ~

記得必須預約,如果唔係只可以係幾個拍攝區影相,咁就錯失最好玩嘅工作坊呀

嗰日同負責人傾計,因為導師人手安排問題,暫時星期六及日都未必可以開放參觀,聽到都真係有點失望不過我相信人手安排都只係新開幕嘅小問題樂在棋中一定會越做越好,到時咩問題都可以解決一個咁好玩嘅地方就可以俾多啲小朋友齊齊去玩啦







沒有留言:

發佈留言