2018年7月23日星期一

【上天下海一天遊】360 大嶼山文化探索深度遊

22 JULY 2018(SUN)

話說依排小小豬每一次經過港鐵入口,佢都一定俾張大大嘅海報吸引住(一張昂坪360最新嘅宣傳),然後佢就會問我.....媽咪幾時帶我去搭360呀?我好想去望好靚嘅風景呀!咁其實我自己都好想去,因為我好想入大澳買海味。

正當我計劃緊搵個好日子三口子齊齊動身之際,收到公關姐姐嘅邀請,體驗360大嶼山文化探索深度遊,一次過可以滿足我同小小豬,就當然即刻報名參加依個咁好玩嘅活動啦~

我地一早就嚟到昂坪360車站出發,之後就當然係去搭纜車,我地今次仲係坐水晶車廂,實在太正了,咁就可以360睇晒四周圍風景,啱晒小小豬啦~

今日真係天公造美,天氣真係好好,所以可以睇得好清楚周圍景色一上到水晶廂,小小豬都已經非常興奮,基本上佢都行晒四個角落睇風景呀~

住水晶廂嘅指定動作就一定係住係玻璃上望住下面嘅風景啦~

說時遲..那時快,望住個靚風景都唔覺原來已經過左大約25分鐘,我地到達目的地啦~

到達昂坪市集之後,我地就先去欣賞「360舞臺」表演,一套以武術為主嘅舞台劇,雖然佢地都係扮打交,不過表演者都好落力呀。由於場內係禁止影相及拍照,所以我地就乖乖欣賞節目,唔可以同大家詳細分享啦!

之後我地就去睇「Tricking極限武術」表演~

一個糅合武術、體操、舞蹈及空中翻騰高難度動作嘅表演,睇得出佢各位表演者都好用心為我地演出,尤其係烈日當空下都大汗疊細汗為我地表演一系到高難度動作,真係十分專業呀~

我地仲有機會同一眾表演者影返張靚相添~

真心的...個表演真係幾好睇,每日都只係做三場,所以有興趣就記得要預時間嚟睇表演哥哥嘅努力啦~

接住我地就轉戰室內,因為可以玩最新推出嘅VR體驗遊戲啦~

場內分別有五個唔同種類嘅VR遊戲,不過...VR遊戲只可以俾16歲以上嘅朋友玩,所以今次嘅試玩專員就交俾DADDY啦

與胡巴捉迷藏 - 一個槍激遊戲漫遊香港鬧市,在大街小巷裡尋找胡巴蹤跡~

高空索道行 - 走過高空索道,移除纜索上嘅障礙物就完成任務啦~

盪鞦韆 - 由昂坪出發,之後就會去到充滿香港特色嘅南山邨了解公共屋邨嘅特色建築同埋市民嘅生活點滴~

百變魔衣櫥 - 只要動一動手就可以換上靚靚衫啦~

光影許願樹 - 只要寫下心願,然後拋到許願樹上就得啦~

玩左大半日都開始肚仔餓,之後我地就先去食附近酒樓食個豐富中菜,接住就去參加「創意紙藝手作坊」啦~

一向做手作仔都唔係小小豬強項,所以初時都唔太有期望,不過整整下又好似幾OK,仲好俾心機去設計佢個立體纜車紙箱相架添~

哈哈哈...個完成品又真係幾好哦~

之後我地就去行下昂坪墟市~

入面都有好多唔同種類嘅手作仔同埋啲自家製食品,我都買左支好好飲嘅蜜糖同一支自家制小香水呀~

行左一陣我地就坐旅遊巴向大澳出發~

嚟到大澳嘅重點活動,就係去搭小艇去搵中華白海豚呀~

我地仲係船上遇到龍舟競賽,現場睇真係好刺激呀~

小小豬好期待可以見到中華白海豚,所以佢都好留心係海面望,希望可以見到~ 

不過由於風浪太大,船長叔叔擔心會有危險,所以行要折返了。雖然都有丁點失望,不過安全最重要,期待下次可以再嚟見下中華白海豚啦

小船出完大海之後,就慢慢步向避風塘,沿路有一排排嘅棚屋~

我地仲去參觀其中一間棚屋~

領隊姐姐仲講解一啲昔日漁家生活事俾小朋友聽添~

棚屋咁有特式,當然要影返張靚相啦~

之後大家慢慢步行出大澳大街,依條新基大僑就係睇大澳風景係最靚嘅位置~

小小豬又係度扮CHOK感受緊大澳水鄉情懷呀~

之後我地就去食大澳嘅地道小食,依個沙翁真係好好食,唔怪之得有咁多人排隊啦~

依個時候我地就分頭行動,兩父子就去食大大粒魚蛋,我就去買少少煲湯材料,之後就坐旅遊巴返到昂坪。

之後小小豬仲提意去搵天壇大佛,不過由於時間關係,已經關左唔可以行嗰幾百級樓梯,所以就係下玫SAY個HI啦~

最後我地搪返纜車到東涌,開開心心又玩左一日啦~

今日真係可以話超級滿足,真係海、陸、空一日就玩晒,唔止小小豬,就連我地兩個大人都一樣玩得好開心又舒服呀(我最開心就係大澳買到靚靚日月魚,嚟緊可以試下煲俾小小豬飲啦)







沒有留言:

發佈留言