2018年9月30日星期日

【邊玩邊學】香港兒童探索博物館

30 SEPTEMBER 2018(TUE)

早係八月尾時都聽到好多朋友仔去香港兒童探索博物館玩當中都係以較細少嘅小朋友玩多,所以當收到邀請時都有丁點擔心唔啱小小豬去。不過與負責哥哥了解後,知道整個博物館都係適合10歲以下小朋友,所以就同小小豬嚟親身體驗玩返一轉~

香港兒童探索博物館係一間慈善機構,目的係希望小朋友可以透過玩樂間一起探索、創造和表達自己。北角地鐵站A2出口嘅對面,真係非常方便~

場內設有儲物櫃,只需要帶備$5銀幣就可以用,咁玩嘅時候就可以更加輕鬆($5銀幣離開時可以取回,當然...可以即時捐俾香港兒童探索博物館)~

館內有4大區域,包括「故事舞台」、「愛耗大自然」、「漫遊小香港」及「小工匠工作室」通過遊玩可以學會很多知識和培育出超越課堂以外的好學之心。

第一站小小豬就嚟玩依個愛耗大自然~

當中樹屋就係小朋友最鐘意地方樹屋繩網內爬來爬去~ 

攀爬都係其次,仲可以有幾個小展品同小朋友介紹花果嘅生長情況同樹葉嘅分別~

樹屋旁仲有一個類似砌牆小玩意,其實係主要講解山泥傾瀉嘅成因~

仲有一個喜閱共榕嘅樹洞閱讀區,玩得耐都要文靜少少嘅~

館內仲提供左好多探索嘅工具,好似顯微鏡大鏡軟尺同量等小朋友就可以體驗唔同物質及特性標本,實行自己學習啦~

仲有一個幾好玩嘅玩意,就係讓小朋友自己將一啲可回收嘅材料好似膠帶紙筒廢紙...等做成一個屬於自己嘅作品,然後放入一個名叫「風之管」嘅儀器上睇下可唔可以做到懸浮或者飛行狀況~

對小朋友嚟講都好刺激,幸好小小豬嘅手作仔都可以飛出「風之管」,咁就俾佢扮叻啦~

依個小遊戲可以話係佢地兩父子玩得最開心嘅地方,因為可以自己設管道,將粒波順利碌到終點~

考智慧得嚟又要考構思,所以都真係一個好好嘅遊戲呀~

仲有得嚟做個小木工,先用大型嘅螺絲同木板體驗一下先~

有左基本概念就可以試下用真正嘅螺絲體驗一返啦~

有一個少少嘅燈影區,可以等小女金索一下光與影嘅關係,仲可以發揮創意,自己構思一個光影小故事呀~

簡單嘅粒粒同橡筋就可以等小朋友自由發揮,砌出自己鐘意嘅字~

有觸覺及嗅覺測試你嘅小遊戲,睇下可唔可以透過觸覺及嗅覺知道盒入面係咩東東嚟呢(小小豬觸覺就冇乜問題,不過嗅覺就.......哈哈哈)~

仲有小手作區,可以自己整個勞作帶返屋企呀~

當然最開心就係嗰一個水彩畫區,可以係玻璃窗上面任意畫畫,真係會畫到唔捨得走呀~

另一個小小豬最鐘意地方就係依個玩沙區職員哥哥會陪小朋友玩之外及仲會講解山脈地理智識,投影顏色嘅沙會根據地形高低而轉變,我從旁睇都覺得好得意呀~

除左遊戲之外,仲有展版教大家齊齊節約用電及用水~

當然唔少得要齊齊合作嘅小遊戲合力關掉所有電器,減低能源消耗,向零度進發完成後仲會有音樂俾大家跳舞呀~

另一展版就係介紹食物嘅來源~

嚟到各位小朋友最鐘意嘅地方,就係可以玩水嘅水之源。不過小小豬就先嚟睇下水源嘅介紹先~

之後就可以慢慢玩水啦~

其實玩水都係其次金金透過玩水遊戲可以透過控制水閘、漩渦同埋製造堤壩,感受水嘅力量,從而探索一下物理嘅原理~

最後就嚟依個故事小舞台,有唔同嘅後台及前台嘅劇景,等小朋友可以發揮自己創意同埋想像力變成一個編劇、導演或者演員~

先嚟去化妝間著個搵個造型先~

之後就可以設計一個小晝板,創作一下自己嘅小故事~

仲可以自己用字詞重整一個小故事~

仲有另一個遊戲可以了解多啲人性特質嘅字詞,啱晒小小豬呀~

依個手偶劇場就係小小豬最鐘意,佢不停係度扮大白鯊的故事~

依個故事播音室都好好玩,搖身一變成為小主播,攝影仲即場即播出嚟可以彴家長們睇到表演~

小小豬都會好留心睇啲展版介紹,所以都學到啲環保同埋生活小知識。 所以話呢…依度就係各有各玩法,各位大小朋友都啱玩呀~

仲有一個漫遊小香港,不過就係俾三歲以下小朋友玩,入面以香港城市為主題透過唔同的感官體驗令小朋友認識香港的交通工具及文化特色~

小小豬就當然玩得好開心,可能佢係屬於大個啲嘅小朋友(場內適合10歲以下小朋友玩),所以除左玩三大展區遊戲外,佢都有好留心睇啲展區內容介紹,所以都學到啲小知識,啱晒我地 "從遊戲中學習" 嘅目標連我家教育部部長都話依度有教育意義



沒有留言:

發佈留言