2018年9月25日星期二

【室內攀石大放電】挑戰難度攀石牆@VERM CITY

25 SEPTEMBER 2018(TUE)

小小豬成日都話佢已經大個仔,唔想再去玩啲BB遊戲,既然依個仔越來越大膽,咁就帶佢去玩啲好玩又刺激嘅玩意,就係嚟VERM CITY來一個室內攀石大放電~

其實之前都有留意到依個室內攀石場,一直都想帶小小豬嚟玩不過都擔心佢怕高又怕辛苦唔肯玩,帶佢去玩都係要佢願意同享受嗰個過程先好嘛,所以就將依個念頭放埋一邊

不過隨住佢係新加坡都玩過啲刺激大膽活動,已經屬於天不怕地不怕之人,剛好SY哥哥又相約一齊去接受挑戰,所以就嚟大玩特玩啦~

全個攀石場係分為兩個部份,我地依啲初哥就當然係去玩啲無需經驗嘅「Clip N' Climb Park」

入去玩之前我地係需要聽少少安全指示,最重要就係聽下點著好安全帶~

「Clip N' Climb Park」入面大大話話都有18款唔同嘅難度嘅攀石活動目測每個牆都有大約5-6米高,我自己睇見都有少少驚(所以全程我都只係陪玩..哈哈)。玩每一個攀石牆都一定要得工作人員扣上及解除安全帶,唔可以自行任意扣上,以保障各位玩嘅大小朋友安全~ 

一入到場小小豬就當然係不停咁攀,唔同嘅牆就有唔同嘅特式同難度,所以每一個都有不同嘅挑戰~

初時玩嘅時候小小豬都係攀左一半就跳落返嚟,可能佢就未習慣同未識用嗰個技巧~

但攀多幾次就越越起勁 ,大部分都可以一口氣爬到最高~ 

最估佢唔到就係可以玩嗰個最難又最挑戰嘅13支樁柱嘅4米梅花樁都可以快快腳完成(佢仲排隊玩左三次添),要知道爬上去都已經唔易,跳落嚟嗰下先係最考膽量(就連DADDY都唔肯玩),所以當佢成功落地時嗰個充滿成功感嘅得戚樣....真係......不過又真係要俾個"叻"依個大膽小小豬...哈哈哈~  

有左成功嘅經驗,小小豬就真係越來越起勁,基本上就好似唔洗休息咁玩完一個就再去排隊繼續玩,點解可以咁精力無限呢~

係眾多攀石牆中,有兩個係好啱親子齊齊玩,就好似依個看似好簡單,但其實係可以兩個參加者計時鬥快攀到最高處~

另一個就係雙人透明牆遊戲係要要依足對方嘅嘅手腳位置同時,又要鬥快攀,當然有個愛豬號爸爸就讓賽啦~

大部分嘅攀石牆小小豬都可以完成,唯獨依兩個真係完全冇辦法,完全係冇從入手不過小小豬肯嘗試都已經係一件好事,所以攀唔攀到都已經係其次,最重要係佢過程中有俾出努力,所以都俾個叻叻佢啦~

攀石場另一面就係Augment Wall要係有經驗及有教練認可能力嘅朋友先可以入去玩呀~

小小豬真係越大個仔就越大膽,佢仲話今日攀唔夠,要搵日再嚟玩過。男孩子係要大膽先好嘛,所以我絕對唔介意再嚟,只係唔好要我陪佢齊齊攀就得,因為...攀到咁高...我都真係驚驚地嘛....哈哈哈!



沒有留言:

發佈留言