2018年10月15日星期一

【哈囉喂Kitty攪攪陣】Sanrio家族玩轉海洋公園哈囉喂

14 OCTOBER 2018(SUN)

海洋公園除左玩鬼屋之外,當然點可以少得今年主打嘅Sanrio家族玩轉海洋公園哈囉喂。3大活動就由Hello Kitty帶領佢嘅一班朋友,同大家齊齊玩住過哈囉喂~

小小豬第一個目的地就當然係去Sanrio糖果村~

入去時記得要拎個袋仔去拎糖糖呀~

沿路都會有Sanrio朋友同姐姐同我地玩遊戲,簡單玩完遊戲就可以有禮物,除左糖果之外,仲有磁貼、筆、閃燈戒指...好多唔同種類呀~

當然係每一個關卡與關卡之間都會可愛嘅Sanrio朋友同大家打卡呀~

基本上我地係依個糖果村行左三轉,所以小小豬收獲都非常豐富呢~

之後我地就走威威天地去玩 「Sanrio家族聯萌哈囉喂派對」不過未去玩就已經有好多靚位俾我地打卡,因為好多可愛嘅Sanrio朋友,每一個都好有哈囉喂特式真係超靚呀~

嚟到就當然係要去玩「Sanrio家族聯萌哈囉喂派對」,小小豬好留心睇下點玩哦~

原來個遊戲都好易玩,利用iPad嘅魔法救出其中三位Sanrio朋友就可以得啦~

其實除左玩之外,入面個場景都好靚呀~

當然....有得玩小小豬就咩都唔理,佢就好努力利iPad嘅小遊戲救朋友仔啦~

成功救出三位朋友仔,就可以去下一個環節,小小豬就最鐘意玩係整蛋糕嘅小遊戲,佢仲玩左兩次添~

我就緊係鐘意同一眾Sanrio朋友影相,每一個場景都仔細,絕對係吸睛之作。不過因為每一節時間有限,所以既要玩遊戲又要影相都真係唔多夠(如果每節時間可以長多少少就好啦)~

嚟到就緊係唔可以唔同一眾Sanrio主角影相,每一個小時都有唔同朋友仔嚟同大家抱抱會,我地就同左梳乎蛋影相。原本我都想同我至愛玉桂狗影,不過小小豬又要去玩所以等唔到,都有丁點失望添~

玩到攰我地就去冰極餐廳食個豐富嘅Sanrio Characters哈囉喂全日祭套餐啦~

先嚟一個「蕃」轉梳乎蛋湯其實佢就係甜椒蕃茄湯嚟呀~

再嚟一個XO與鬼怪森林,係一個香脆蟹餅配藍莓沙律汁嚟,佢個蝦餅都好,小小豬話個XO造型餅乾都好好食呀~

Hello Kitty 尋寶之旅,即係焗海鮮南瓜飯配菠菜汁,除左有Hello Kitty樣嘅芝士之外,仲有南瓜、帶子、青口....好豐富呀~

Kuromi黑魔法哈,依個係龍蝦竹炭漢堡配炸南瓜,佢個賣相真係超正,入面仲有啖啖龍蝦肉添~

嚟到我地嘅甜品,依個XO墓碑探險其實就係芝麻芭菲配牛油曲奇芝麻芭菲我都係第一次食,估佢唔到又幾好味,好重芝麻味之餘又一啲都唔甜,所以話咁快就俾我同小小豬KO晒啦~

最後小小豬就嚟獨享Hello Kitty 哈囉喂橙汁梳打特飲~

佢仲大讚話好好飲添~

我地全日最後一個活動就係去水都餅店食甜品,先嚟Sanrio characters 馬卡龍一盒有四個唔同主角嘅哈囉喂特別造型,真係可愛到唔捨得食呀~

仲有Sanrio Characters鮮果忌廉脆筒,我地ORDER左XO嘅藍莓紫薯味同Hello Kitty嘅雜莓朱古力味~

小小豬話個藍莓紫薯好好食,仲叫我下次入園要再買俾佢食添~

今年嘅海洋公園哈囉喂真心覺得係超正,一眾Sanrio Characters嘅佈置真係超級靚,所以就算係唔係Sanrio Fans都一定會入嚟不停影相

有左今年成功經驗,唔知出年哈囉喂又會唔會見到Hello Kitty佢地呢.......當然係超級希望見到,到時一定要再嚟過玩哈囉喂呀!





沒有留言:

發佈留言