2018年10月25日星期四

【試用分享】vivo V11手機初體驗

25 OCTOBER 2018(THU)

手機對於我嚟講最大用途都唔係用嚟傾電話,絕對係大部分都用嚟影相拍片同埋上網。今次應vivo邀請試用佢地最新出嘅V11手機,一部好啱用作影相拍片嘅手機,又真係幾啱我心水哦~

可能香港嘅人對vivo呢個手機品牌唔太熟悉,不過有睇開中國綜藝節目應該對佢唔陌生,經常會見vivo贊助好多受歡迎嘅電視節目,仲係今年嘅俄羅斯世界盃指定手機品牌,係國內同東南亞都係好多人用。vivo係香港都有行貨賣,今次就試下最新出嘅V11手機。

V11推出左兩種顏色,而我收到嘅就係藍紫漸變嘅「星雲」色,真心覺得超靚。包裝盒內有齊原裝保護套、三腳充電器、MircoUSB 線、3.5mm 耳機及說明書。機身係採用三卡槽設計,可以同時使用兩張SIM卡同一張 MicroSD呀,唔洗換SIM卡好方便~

V11其中一項好特別嘅功能就係屏幕指紋,只需要係屏幕上輕按指紋感應位置就可以解鎖,又快又方便,仲好有科技感,以前無諗過可以直接係屏幕上用指紋解鎖。除左使用指紋掃描之外,V11仲可以利用前置鏡頭進行面部識別解鎖,而且解鎖速度都幾快,平均幾秒就已經開到,就算拖住小小豬就咁望下個電話就解到鎖,所以都好方便呢~

V11可以用指紋及面部同時進行識別,當兩者其中一種方式識別成功,就可以進行解鎖~

V11係採用6.41吋水滴全面屏設計,得一點前鏡頭,唔會有個大瀏海,盡用機面每個角落,咁上網、睇片就可以更加清楚啦~

我最關心嘅就當然係佢嘅影相功能,手機嘅主鏡頭係採用1200萬+500萬像素雙鏡頭設計,有埋Dual Pixel可以影到2400萬像素,而光圈就係 f/1.8嘅大光圈,所以相片嘅清晰度及細緻度都唔錯,直出嘅顏色都好SHARP呀~

小小豬一向都好自戀,佢都不知幾鐘意玩自拍,所以自拍效果都係我地好關注一部分。V11前置嘅自拍鏡頭有2500萬像素,最大光圈可以去到f/2.0 光圈,所以自拍部分效果都好好,整體上細緻度都幾高~

我自己就幾鐘意V11嘅「AI逆光」拍攝功能,可以解決曝光不均衡嘅問題,咁就係逆光或者係強光嘅情況下都可以影到靚相好似係海洋公園入面咁猛陽光,就算背住太陽都一樣影到好清晰嘅人樣,用V11影逆光相就最正~

不過V11最好玩都係「人像散景功能」,只要開住呢個模式影相,就可以自行調較對焦點嘅光圈,亦可以係拍攝完畢之後開返張相,慢慢再選出唔同景深位置及光圈,而且散景嘅效果都非常自然,同一張相可以玩到唔同景深效果,好簡單就影到好似用專業相機影嘅靚相~

V11主鏡頭最高支援4K影片拍攝,前置鏡頭就720p,影像質素都算細緻,不過最好玩就係可以係拍攝時即時美顏一番,咁就可以隨時拍片/開live都可以最佳狀態啦~

由於係V11採用雙充電晶片,所以只要用上原裝充電器,就可以支援快速充電。我試過用電量得返單位數字時,只需要一個鐘多少少就可以充滿返晒啦,急起上黎要用電話都唔洗慢慢等佢充電咁麻煩~

整體上我用落vivo V11感覺好好,最鐘意佢嘅大屏幕,咁我用手機剪片就可以更加清楚,而且手感又滑滑又幾好拎手,機背嘅星雲紫藍漸變色好靚好特別。當然V11影相效果我都非常滿意,尤其係人像功能我真係密密用,超鐘意佢嘅景深效果呀,小小豬都係咁拎住部V11自拍!


More Information : 
Website: www.vivo.com
Facebook:https://www.facebook.com/vivohongkong/





沒有留言:

發佈留言