2018年11月25日星期日

【好友開心齊齊玩】聖誕溫馨家庭樂@嘉湖海逸酒店

24-25 NOVEMBER 2018(SAT-SUN)

小小豬今次可以話係雙倍興奮,既可以應邀嚟參加嘉湖海逸酒店為聖誕節推出嘅「聖誕溫馨家庭樂住宿計劃」,又可以同佢嘅好朋友齊齊玩,實行開開心心享受一個愉快嘅週末呀~ 

我地CHECK-IN之後就當然要即刻到房間望望兼休息一下,其實整體上房間都唔唔錯,設備都好齊全,我最鐘意就係佢夠晒光線(我真係好怕啲房間黑沉沈咁...你懂的...哈哈哈)感覺都幾舒服呀~ 

望出去個VIEW都唔錯,最緊要係景觀非常開揚,而且仲可以望到公園同游泳池~

我們第一個活動就係去做「聖誕小廚神」跟Ken師傅學整冬甩~

其實我真係幾鐘意佢地嘅COOKING CLASS,因為一切係由零開始,要小朋友真正落手落腳去做,咁先可以俾佢地感受到整嘢食嘅意義同樂趣。

材料及份量就係預先為小朋友預備好,只要跟住師傅嘅指示一步步就可以整到個麵漿啦~

可能小小豬都有過經驗所以佢都好快手就可以完成,仲扮晒叻咁話..都好易整呀~

係助教哥哥幫我地拎啲麵漿去焗冬甩嘅時候小朋友就要開始為聖誕樹同聖誕老人上糖霜扮靚靚啦~

小小豬之前去其他工作坊都有試過依啲唧花佈置,但嗰時佢真係既冇心機又HEA整,所以都真係勁樣衰~

今次唔知係咪有朋友仔同場(咁佢又大個仔左啲),佢吱得超專心,而且仲整得唔錯呀(起碼都有返個樣睇呀....哈哈哈)~

冬甩焗好之後,就可以做埋最後一個裝飾步驟啦~

將冬甩加入朱古力漿之後,再加啲粒粒..星星做佈置就得啦~

小小豬嘅製成品完成啦,我就覺得都幾靚,起碼係絕大部分都係佢自己整,就係依一點都要俾滿分佢啦~

即刻整完當然要即試,睇小小豬大口大口咁食就知佢有幾滿意自己個完成品,仲不停讚好味呀~

做完小廚神就到各位小朋友最期待嘅放電環節,四項聖誕特備戶外活動(每個家庭可以有4張遊戲券)

小小豬第一時間就去「遙控車競賽」玩遙控車(每券玩樂15mins)~

小小豬一向都唔太識玩遙控車,不過好在今次依款越野遙控車都非常容易操控,負責哥哥好耐心咁教左幾次之後,小小豬都開始上到手,都叫做玩得唔錯,唔會成日反車呀...呵呵~

不過....好似DADDY比小小豬玩得仲開心投入哦~

之後就去玩「巨型充氣滾輪」 (每券玩樂10mins)~

依個滾輪之前都玩過水上,但原來轉左做陸地版時,個滾輪係會轉得仲快,小小豬話好玩刺激好多呀~

嚟到「我是小車手」就係小小豬最鐘意玩嘅一個項目 (每券玩樂15mins)~

有兩款賽車可以揀,以小小豬係比較大個少少嘅小朋友就建議選擇大車,除左係坐得比較舒服之外,佢嘅速度都係比較快,今次仲唔係頭搖又尾擺,個個小朋友都進入忘我極境界呀~

最後就嚟到「彈跳天地」 (每券玩樂15mins)~

其實有好朋友仔相伴係入面彈彈下又跳跳,你追我走咁,雖然看似係一個好簡單嘅環節,但見到佢地三個嘅互動中嘅嘈吵笑聲,都知佢地係幾鐘意有同伴相陪嘅玩樂時光~

每個入住家庭都可以獲得「菠蘿油妹妹」聖誕毛公仔一個添~

開心放完電之後,我地各人就回房間休息一陣充充電,之後就到酒店餐廳食豐富嘅自助餐晚餐。(註: 自助晚餐需另行收費,每兩個大人就可以有一個小朋友免費進餐)

今次主題係「冬日嚐鮮自助餐,所以佢嘅種類都有好多,我心水推介就有肥嘟嘟嘅生蠔、超多膏嘅麵包蟹、勁鮮甜松葉蟹腳、仲有外層薄脆嘅香煎鵝肝,真係超級好味呀~

另外我自己都幾欣賞佢地即叫即煮嘅喇沙,少少辣得嚟又唔係好刺激嗰種,而且材料都好足呀~

不過論各位小朋友至愛就一定係依個即製液態氮雲呢拿雪糕,睇住大廚表演時嘅不斷煙真係睇到佢地不停大叫「嘩嘩嘩」呀~ 

液態氮雪糕比起軟雪糕就仲更加滑身,三個小朋友都不停讚添~

雖然都玩左成日,但係成班小朋友都仲未覺得攰,所以就我地三家人集合一個房間,嚟一個決戰大富翁。其實依都係小小豬最期待一環,由佢買左依盒新大富翁嘅時候都成日問我幾時可以同SY哥哥仲有子子一齊玩,終於都俾佢等到今日依個決戰啦....哈哈哈~

其實小朋友嘅世界就冇好簡單,好想同自己好朋友一齊玩將鐘意嘅遊戲同佢地分享原來轉眼間三位小朋友都識左差唔多五年,真係可以話相識於BB時代我亦都好慶幸小小豬可以有兩位好朋友可以陪佢一齊玩一齊成長。期待佢地可以繼續保持單純嘅童真,齊齊開心咁繼續成長,最重要係之後繼續有好多個五年嘅友誼

舒舒服服瞓醒覺之後,我地就去嘆個豐富嘅自助早餐,然後三位小朋友就當然係繼續玩。今次就到SY哥哥同子子教小小豬玩陀螺,依隻豬仔由初時嘅唔敢玩,到之後開始熟習,再繼而三人比賽,不停發出嘻嘻哈哈嘅歡笑聲~

係度要特別多謝SY哥哥(當然唔少得仁叔叔),因為佢為左要教依隻豬仔玩,仲預先買左一套陀螺用具送俾佢,等小小豬可以玩得更加投入(依家每晚都加插一轉陀螺時間呀...哈哈哈)~

三個小朋友玩到12時先肯退房話咁快就過左兩日一夜渡假之旅,間中嚟一個小渡假都唔錯(最重要係放下電腦手機嚟一個真渡假),大小朋友都可以叉叉電,人都輕鬆啲呀! 



 More information :
聖誕溫馨家庭樂住宿計劃 15/12/2018 - 31/12/2018
三人同行$930起+10%服務費 (2018年12月9日前早鳥預訂85折)
豪華客房住宿一晚
自助早餐2位成人及1位小童
「菠蘿油妹妹」聖誕毛公仔(乙隻)
「聖誕小廚神」冬甩製作班 (一堂)
四大聖誕特備戶外活動
小朋友俱樂部+户外遊樂場


Website:https://bit.ly/2DWdSXK
Facebook:https://www.facebook.com/HarbourPlazaResortCityHK/


自助晚餐​ (18:30 - 21:30​ )
星期六 成人$488 小童 $338
星期日 成人$468 小童 $318
***小童免費自助晚餐(2位成人正價,1位小童免費)***




沒有留言:

發佈留言