2019年1月15日星期二

【滋潤養顏】蘋果雪梨雪耳無花果瘦肉湯

15 JANUARY 2019 (TUE)

依排都真係好乾燥,望到小小豬個咀仔都開始乾乾,所以就諗起要煲返個滋潤湯等佢可以潤返下。見屋企仲有半包雪耳係度,所以就嚟煲蘋果雪梨雪耳無花果瘦肉湯啦~

蘋果具有生津止渴、潤肺除煩、健脾益胃、養心益氣、潤腸、止瀉、解暑、醒酒等功效;雪梨就可以清熱降火,潤肺去燥;雪耳有助潤肺、潤膚同養顏嘅功效;無花果潤肺止咳、清熱潤腸;南北杏可止咳下氣,潤燥消積。(網上資料)


蘋果三個、雪梨四個、雪耳一兩、無花果四粒、南北杏一湯匙及瘦肉$30~


蘋果刮去果蠟果蠟後去芯切塊~

雪梨洗淨後去芯切粒塊雪梨芯一定要去得好清,如果唔係成煲湯就會變酸啦~

雪耳浸透,然後剪去硬蒂再剪細舊~

無花果及南北杏浸洗一陣~

瘦肉汆水備用~

煲內放約2.5L水,然後加入所有材料~

待滾後,先用大火加蓋煲約15分鐘~

然後加入雪耳~

再轉慢火加蓋煲多1.5小時~

最後加少少鹽調味就飲得啦~

我都有一排冇煲雪耳湯,所以當小小豬見到啲雪耳時雙眼就好似發光,哈哈哈....因為我之前同佢講話過食雪耳變靚仔,佢想更加靚仔咪鍾意食雪耳(哈哈哈...人仔細細就咁貪靚)。不過其實啖湯都好清甜,飲完都覺得好滋潤呀!

溫馨提示:
- 由於個別人仕體質不同,所以大家記得煲之前了解下自己,如有疑問,請先向註冊中醫查詢!
- 雖然雪耳係好味又有益,不過都要再提多大家煲過嘅雪耳一定要即日食/飲晒,如果隔夜,經過一夜嘅浸透,佢就會放出一啲有害物,到時就有益變有害啦!


沒有留言:

發佈留言