2019年1月12日星期六

【寓學習於娛樂】DIY鐳射切割賀年糖果盒

12 JANUARY 2019 (SAT)

新年將至小小豬就已經叫我為佢準備啲賀年糖果,仲叫我搵一個小盒嚟放佢嘅糖果,等佢用嚟接待佢嘅客人。剛好收到DIY鐳射切割賀年糖果盒工作坊邀請,既可以自己設計又可以學習STAM原理,所以就同小小豬嚟試下整返個靚靚糖果盒啦~

我地就係嚟Inno Space知創空間,學習利用鐳射切割機做一個獨一無二嘅木製賀年糖果盒~

第一步就係要小小豬自己設計盒上面嘅圖案~

完全零藝術天份嘅小小豬平日叫佢自己設計畫圖畫真係好似係苦工不過今次又一反常態,超合作兼勁快手就設計好晒。佢話自己係豬仔,加上又係豬年,所以畫晒啲豬就得,總之就係....豬。全部都係豬....哈哈哈~

之後就可以將圖畫SCAN入電腦~

係電腦入面就可以再加多點設計,為盒仔作最後嘅扮靚靚~

小小豬最後嘅完成圖,佢再加多左啲揮春,多左好多新年氣氛哦~

最後就可以將木板放入鐳射切割機進行打印同切割啦~

係依個時候負責叔叔就會好有耐性地解製作當中所涉及STEM原理,雖然小小豬都可能未明白得晒全部,但佢都乖乖聽書,所以都有學到少少嘅~

為左要睇住個製成品誕生,小小豬都八卦豬咁企定定係部機旁邊。當見到有少少圖案打印緊嘅時候,佢都不知幾興奮咁尖叫出嚟(真係俾佢嚇C呀...哈哈哈)~

打印好晒就會自動變成切割木板啦~

所有組件切割完成後,就可以進行下一步驟~

看似好簡單嘅組裝,但原來都有少少難度,因為每一位準位都要夾得好準,而且都要用少少力去砌~

好在有叔叔慢慢教導同幫忙,小小豬都叫做可以係半幫半做下完成~

最後就嚟到上色,小小豬話個盒身圖案印得好靚唔洗再加顏色,所以就集中為個盒蓋塗上顏色啦(好明顯係一個懶塗顏色的藉口....哈哈哈)~

小小豬自己設訐嘅賀年糖果盒真係大功告成啦~

認真的.....四面都真係幾靚嘅,不過個盒蓋就.............,但既然係佢自己一手一腳嘅設計,佢自己又非常滿意,咁我都應該學懂欣賞佢嘅藝術風格~

其實我都真係幾鐘意同小小豬參加依啲工作坊,一切由零開始再到見到件完成品,嗰一個滿足感真係幾好。當然...係製作過程仲學到啲新科技知識,同埋又可以訓練下專注力,真係啱晒我「遊戲中學習」嘅宗旨。

嚟緊都會有工作坊舉行,有與趣朋友仔可以到以去官方網址睇下活動詳情(適合8歲或以上小朋友參加)


More Information:
Website:
https://www.hkpcacademy.org Facebook:https://www.facebook.com/hkinnospace



沒有留言:

發佈留言