2019年3月22日星期五

【快閃郵輪體驗】世界夢號海上日本祭@星夢郵輪

22 MARCH 2019 (FRI)

還記得上年暑假我地約埋朋友仔齊齊上星夢郵輪過左一個非常開心嘅旅程(按此重溫),小小豬對《世界夢號》一直念念不忙,佢話上次實在玩得唔夠喉,最掛住就係嗰個嬉水區同水上滑梯,又話有好多表演同埋故事分享我地冇去睇所以就話好想再上郵輪玩(唉...豬仔....我何嘗又唔係好想再嚟呢...哈哈哈)

今次終於可以有機會再上船玩啦,因為我地應邀嚟參加海上日本祭體驗之旅,雖然只係快閃玩兩個半鐘,不過都夠小小豬興奮啦~

原來《世界夢號》嘅海上日本祭係由三月中開始至到六月中,係郵輪甲板上舉行,有街頭小吃同埋遊戲攤位,另外仲有啲創意文化工作坊俾各位大小朋友參加呀

今次因為係體驗關係,所以未有時間慢慢細看郵輪各項設施我地一上到郵輪就即接到船頭甲板去參加日本祭~

甲板上望出去個風景真係勁正呀~

開始活動之時,就先由菲藉廚師示範用Bruno整製作日式章魚燒~

加入粉漿再加入八爪魚粒粒,都好似幾簡單呀~

話咁快廚師就整好章魚燒,我地開餐啦~


Bruno爐我自己都成日用,不過又好似未用過嚟整章魚燒,所以當小小豬見到心思思想去試下整,最後廚師叔叔就俾小小豬做個小幫手啦(註:正式活動只有廚師示範)~

小小豬都好似整得有板有眼哦~

不過當要整成波波形狀時就有點困難,最後要廚師叔叔出手啦~

之後就緊係要食返自己嘅製成品,小小豬話自己整嘅係特別好味哦~

之後仲有Bruno爐沖繩Agu豬肉大阪燒添~

特別一提依啲Agu豬肉係由沖繩直接運送,而且唔會對外出口,所以只係海上日本祭先可以食到呀~

又有菜又有豬肉嘅大阪燒小小豬都話好味道呀~

除左依兩樣美食,我地仲有試食左炸雞、Agu 豬肉、日本和牛同埋梳乎厘添~

仲有小小豬強烈推仲嘅沖繩菠蘿汁呀~

食住美味食物嚟睇夜景,感覺真係勁舒服,超有渡假FEEL呀~

食飽飽我地就去參加立體達磨彩繪工作坊「達磨」可以話係日本嘅吉祥物,而《世界夢號》嘅「達磨娃娃」,就特別在擁有一條魚尾,更加可以代表海洋的祝願~

每一個唔同顏色嘅娃娃就代表唔同嘅祝福,所以工作坊就可以讓我地因應自己想期待嘅願望,將「達磨娃娃」塗上先己嘅顏色~

一個心願多多又想得到唔同祝福嘅小小豬諗左好耐都唔知塗咩顏色好,所以最後佢就將所有祝福嘅顏色都塗上娃娃身上,咁就可以集所有願望於一身啦~

經小小豬一輪努力,屬於佢嘅「達磨娃娃」終於誕生,雖然係看似有點驚嚇(哈哈哈),不過隻豬仔都不知幾鐘意,仲話要放係佢自己個圖書櫃,等待祝福到來哦~

最後仲可以寫係娃娃心願卡上寫上自己嘅願望去許願,不過依個小小豬扮作神祕,唔肯俾我睇佢寫左咩願望,真係令到我心思思添(佢都開始大個仔啦,就留返丁點私隱俾佢,話唔定佢遲啲會講返俾我知呢)~

寫好娃娃心願卡就可以去達磨櫻花神社許願啦~

依個傻豬仔好認真咁許願,見佢個樣都真係好好笑,所以....我都希望佢可以夢想成真啦~

小小豬仲去左抽「達磨」扭蛋機,係抽之前佢不停話好緊張,因為佢想抽到個LUCKY娃娃,將好運帶返屋企哦~

終於小小豬就抽到一個金色娃娃,佢就話要轉贈俾DADDY,因為金色就係代表財運好嘛....哈哈哈~

最後我地就去船上搵唔同顏色嘅達磨娃娃影靚相~

當小小豬見到依個學業成就嘅娃娃時,佢既然主動要影合照~

開心嘅時間真係過得特別快,原來已經到左我地要落船嘅時候,其實唔止小小豬就連我地有點唔捨得落船

經過今次快閃一轉我就更加想再上郵輪玩過(啲癮真係飛晒出嚟啦),尤其今次嚟到俾小小豬知道原來郵輪係有五日沖繩海上之旅,佢話咁就可以更加多時間係郵輪上大玩特玩,到時就一定可以玩過痛快

哈哈哈....俾小小豬講講下,我都非常心思思添,就算唔去五日行程,平日簡單嘅三日兩夜都可以嚟一個短短充電都唔錯

等我認真計畫下我地嘅行程,希望好快就可以俾機會小小豬願望成真啦






沒有留言:

發佈留言