2019年4月12日星期五

【大鄉里食大餐】休閒半自助晚餐@Marbling

12 APRIL 2019 (FRI)

今日約埋兩位姨姨帶小小豬去食半自助餐,就係咁依隻小小豬又嚟問題少年上身由出門口就問到去目的地咩係半自助晚餐哈哈哈...唔好問咁多總之有得食大餐就得啦~

Marbling係銅鑼灣Fashion Work入面,整體上氣氛都好好,有一種舒服閒適嘅感覺可以選擇室內或室外座位添~

不過...我依啲怕熱之人就當然係揀室內(有冷氣食得更加舒服嘛),職員都好細心,見到同行有小朋友,所以佢就安排左梳化位置,咁小小豬就可以舒舒服服食飽飽啦~

一嚟到小小豬就急不及待想知有咩好食半自助餐就即係任食前菜、沙律及甜品,然後就自選主菜同埋飲品,第一次接觸嘅小小豬話好新奇,佢仲話唔理咁多有得自己出去拎食物都已經夠佢開心~

前菜都好有好多種類,有好多款嘅唔同嘅沙律之外,仲有風乾火腿煙三文魚凍蝦同埋青口~

仲有五款芝士任食添~

小小豬就開心密密食,佢真係來來回回都行左好幾次,真係唔洗食主菜都飽晒啦~

我都唔理咁多,先嚟開大餐先~

先嚟一杯蘑菇湯,雖然就細杯左少少,不過都幾好飲,入口好重蘑菇香而唔會感到好膩~

我同小小豬嘅烤英國豬柳扒 - 佢個豬柳都幾嫩滑,配埋蘋果蓉同埋個焦糖洋蔥醬都真係好夠味。不得不提那個焗薯蓉,真係好入味,小小豬仲同我搶食添~

Daddy嘅精選燒烤拼盤 - 牛扒同羊扒嘅肉味都好濃又夠腍煎帶子同埋大蝦又夠惹味~

表姨嘅芝士焗龍蝦帶子配特級牛柳 - 龍蝦面釀滿芝士,單看賣相已經好吸引。龍蝦肉肉質彈牙,入口又充滿芝士牛柳又係厚切,充滿肉汁又夠腍身~

姨姨嘅熟成黑安格斯特級肉眼 - 大大塊肉眼好吸引,而且又充滿豐富肉汁仲好夠腍身呀~

明明說好的我同小小豬一人一半,到最後依隻為食豬差唔多將一份餐食晒呀~

食飽飽正餐又嚟甜品時間,蛋糕忌廉泡芙北海道牛奶布丁同埋生果都有,而且職員都回得好快,所以想食邊款都一定可以試到啦~

小小豬話個北海道牛奶布丁就最好食(咁我都覺得好味)奶味香濃得嚟又,而且又唔甜,所以食兩杯都唔會好過分呀....哈哈哈~

最後嚟埋杯餐飲,咁就真係夠晒完美啦~

整體嚟講,今次依個半自助晚餐嘅質素都唔錯,食物都真係幾夠味(小小豬直頭話有100分添)。另外都一定要提下職員哥哥嘅服務態度真係好好,除左成日幫我地斟水同換碟之外,見小小豬在場都會主動問要唔要飲暖水,真係係貼心呀!



沒有留言:

發佈留言