2019年11月27日星期三

【滋補助發育】太子蔘田七螺片烏雞湯

26 NOVEMBER 2019(TUE)

話說之前聽店主叔叔介紹煲左個滋補長高嘅太子參淮山田七瘦肉湯俾小小豬飲(按此重溫)每次都算係威迫利誘,不過一聽到係"快高長大湯"小小豬都會乖乖咁飲嘅

不過由今次開始佢就可以好暢心地飲"快高長大湯",因為今次我加左乾螺頭及烏雞去煲,除左滋補强壯,幫助長高及對脾胃功能弱的人之外,仲可以幫助抗疲勞、提高學習和記憶能力嘅作用添~

乾螺頭兩両、太子參半両、田七半両、淮山一両、紅棗十粒、烏雞一隻及蜜棗三粒~

乾螺頭用清水放在雪櫃浸一晚~

紅棗洗乾淨後去核
其實在一個好簡單方法就可以去,就係用先拎住一粒棗,然後將筷子由頂部開始,慢慢用少少力咁穿過去,就可以好輕鬆咁去核啦~~


其他藥材浸洗一陣~

烏雞洗淨汆水~

煲內放3L水,待水滾後加入所有材料~

待再次水滾後用大火加蓋煲約15分鐘~

之後轉慢火加蓋煲多2小時~

最後加鹽調味,就可以飲得啦~


對比起上次嗰一款田七湯,今次絕對係好飲好多,可能就乾螺頭所以佢嘅鮮甜味就蓋過左田七同太子參嗰一陣淡淡嘅似人參嘅味道,所以今次小小豬唔洗威迫利誘都飲左兩碗

既然佢肯飲食款湯,我就緊係會繼續煲,咁依隻唔識高又唔識大嘅小小豬可以快高長大


以下係各食材嘅功效,可以參考一下呀(網上資料)  

烏雞 - 含有大量蛋白質,而膽固醇含量極低,是高蛋白、低脂肪的滋補佳品。而且烏雞所含有嘅DHA和EPA物質還可以提高兒童智力,經常食用可以有效調節生理機能,提高人體免疫力。

乾螺頭 - 具有滋陰補腎等作用,不但營養價值高,且是一種高蛋白質低脂肪的食品,對氣虛血弱、貧血衰弱者甚有益處。

田七 - 除可以止血外,尚有通脈行瘀及造血之作用,能促進小朋友發育長高、提高學習和記憶能力的作用

太子參 - 又名孩兒參,它不是參科植物,屬石竹科植物,有人參功效但力稍弱,很適合小朋友用

淮山 - 健脾開胃,其他好處為治療久泄久痢、肺氣虛燥、及消渴尿頻等症

紅棗 - 均補心脾及益氣安神。

蜜棗 - 止咳潤肺、化痰平喘功效。  


馨提示: 
孕婦及感冒患者不宜飲用
- 由於個別人仕體質不同,所以大家記得煲之前了解下自己,如有疑問,請先向註冊中醫查詢!



沒有留言:

發佈留言