2020年12月31日星期四

【健脾潤肺】西洋菜栗子陳腎豬骨湯

31 DECEMBER 2020(THU)

今朝買餸時見到又有靚靚嘅西洋菜即刻心心眼,正當我諗緊煲乜料嘅時候,店姨姨就教我用栗子同陳腎一齊煲,佢話西洋菜同栗子係好夾,煲出嚟啖湯特別甜哦~

既然店姨姨介紹,我又真係未試過依個配搭,屋企又剛剛入手左一包陳腎,咁就聽姨姨話試下啦~

西洋菜一斤、栗子半磅、陳腎兩隻、紅蘿蔔一個、南北杏一湯匙、蜜棗三粒、陳皮一角及豬骨約$45~

西洋菜先用鹽水浸佢一小時,中途最好換兩次水,因為西洋菜係水種植物,一定要洗乾淨啲呀~

陳腎浸至軟身後然後切塊~

陳皮浸軟刮去皮瓤~

蜜棗及南北杏浸洗一陣~

紅蘿蔔去皮切塊~

栗子清洗乾淨~

豬骨汆水~

煲內放約3L水,隨水加入陳皮~

待水滾後加入所有材料(西洋菜除外)~

等再次滾起後,先可入一半的西洋菜。一定要大滾先好加人西洋菜,如果唔係煲出嚟嘅湯就帶點甘苦味呀~

再次大滾之後,就可以加入餘下的西洋菜~

繼續用大火加蓋煲約30分鐘~

之後轉慢火加蓋煲多1.5小時~ 

最後加鹽調味,就可以飲啦~

千其唔好漏左啲煲湯料,所有湯料都食得,好味之餘仲可以係晚餐諗少一個餸呀~

店姨姨真係冇介紹錯,煲出嚟啖湯又真係幾好飲,西洋菜同栗子兩個味又唔會互搶,入口仲好似比其他材料煲嘅西洋菜甜啲添。


以下係各食材嘅功效,可以參考一下呀(網上資料):

西洋菜 - 有清熱潤肺、助咽喉炎、氣管炎、肺結核、扁桃腺炎及百日咳等的功效。特別屬於燥熱性的咳嗽,療效更為明顯。
栗子 - 有助健脾胃、增進食慾、改善腸道健康及增強扺抗力。 
陳腎 - 有養胃生津、消食健脾、潤肺祛燥的作用。 
紅蘿蔔 - 具有清熱、解毒、利濕、散瘀、健胃消食、化痰止咳、順氣、利便、生津止渴、補中、安五臟等功能。 
陳皮 - 理氣健脾、燥濕化痰。 
南北杏 - 可止咳下氣,潤燥消積。 
蜜棗 - 止咳潤肺、化痰平喘功效。


溫馨提示:
- 由於個別人仕體質不同,所以大家記得煲之前了解下自己,如有疑問,請先向註冊中醫查詢!


沒有留言:

發佈留言