2022年2月23日星期三

【健脾潤肺】粟米雪耳淮山瑤柱湯

23 FEBRUARY 2021(WED)

宅在家想飲湯,好在之前都買定啲煲湯料,再加埋前日買左兩條粟米看門口,咁就夠晒材料嚟煲返個粟米雪耳淮山瑤柱湯,等小小豬有得健脾胃之外,老公又可以潤潤肺(你知啦...仲要返工嘅佢出入都係護下個肺安全啲)~

粟米兩條、乾瑤柱五粒、漳州雪耳一両、淮山一両、腰果約一飯碗、椰棗四粒、南北杏半両、陳皮一角~ 

粟米洗淨切段~

雪耳浸透,然後剪去硬蒂再剪細舊~

陳皮浸軟後刮瓤~ 

乾瑤柱洗乾淨浸半小時,然後摵為絲~

其他材料浸洗一陣~

煲內放約2.5L水,然後隨水加入陳皮~

待滾起後,加入所有材料~

待再次滾起後,繼續用大火加蓋煲約15分鐘~

之後轉慢火加蓋煲多1.5小時~

最後加鹽調味,就可以飲得啦(真係少少就可以,因為本身乾瑤柱都帶點咸味呀)~

雪耳絕對係小小豬至愛,因為我成日都逗佢話食左雪耳會靚仔,所以佢一見到就會心心眼狂食呀...哈哈哈!

啖湯雖然冇落肉但就用左乾瑤柱,再加埋粟米嘅香,所以但啖湯都勁甜,三口子話咁快就KO晒成煲湯啦!


以下係各食材嘅功效,可以參考一下呀(網上資料):
粟米 - 健脾和胃,利水通尿,益肺寧心。
乾瑤柱 - 有助降血壓、降膽固醇及補益健身。而且還具有抗癌、軟化血血管及預防動脈硬化等功效。
漳州雪耳 - 有助潤肺、潤膚同養顏嘅功效。
淮山 - 健脾開胃,其他好處為治療久泄久痢、肺氣虛燥、及消渴尿頻等症。
椰棗 - 可補中益氣、止咳潤肺、補血等。
南北杏 - 可止咳下氣,潤燥消積。
陳皮 - 理氣健脾、燥濕化痰。
腰果 - 素湯加入腰果,可令湯更鮮甜濃稠,卻不會像肉湯般油膩。
 

溫馨提示:
- 由於個別人仕體質不同,所以大家記得煲之前了解下自己,如有疑問,請先向註冊中醫查詢!
- 雖然雪耳係好味又有益,不過都要再提多大家煲過嘅雪耳一定要即日食/飲晒,如果隔夜,經過一夜嘅浸透,佢就會放出一啲有害物,到時就有益變有害啦!


沒有留言:

發佈留言